బాదం పప్పు మితంగా తినాలి!

బాదం పప్పు మితంగా తినాలి!

బాదం పప్పు మితంగా తినకపోతే బాధలే!

ఆరోగ్యంగా ఉండాలంటే మంచి ఆహారాన్ని తీసుకోవడం చాలా అవసరం..అటువంటి అలాంటి మంచి ఆహారాల్లో నట్స్, సీడ్స్ ముఖ్యమైనవి. నట్స్‌లో ఎక్కువ మంది బాదం పప్పులు తినేందుకే ఇష్టపడతారు. దీంతో ప్రపంచవ్యాప్తంగా బాదం పప్పుకి మాంచి డిమాండ్ ఉంది. ప్రస్తుత శాఖహార ట్రెండ్‌లో చాలామంది బాదం పాలు, బాదం బటర్ తదితర వెరైటీలను ఆస్వాదించేందుకు ఇష్టపడుతున్నారు. అయితే బాదం పప్పు మితంగా తినకపోతే బాధలు తప్పవని నిపుణులు స్పష్తం చేస్తున్నారు.

బాదంలో బోలెడన్ని పోషకాలు ఉన్నాయని ఆహార నిపుణులు చెబుతున్నారు. గుప్పెడు (సుమారు 28 గ్రాములు) బాదం పప్పులు 161 క్యాలరీలు శరీరానికి అందిస్తాయి. ఇంకా ఇందులో 3.5 గ్రాముల ఫైబర్, 6 గ్రాముల ప్రోటీన్, 2.5 గ్రాముల పిండి పదార్థం, 14 గ్రాముల కొవ్వు, 37 శాతం విటమిన్-ఏ, 32 శాతం మెగ్నీషియం ఉంటాయి. దీనివల్ల శరీరానికి ఇంకా ఎలాంటి ప్రయోజనాలు ఉన్నాయో చూడండి.

రక్తంలో కొవ్వును తగ్గిస్తాయి:
రోజు బాదం పప్పులు తినడం ఆరోగ్యానికి చాలామంచిది. ఎందుకంటే ఇది రక్తంలో కొవ్వు స్థాయిలను తగ్గిస్తుంది. కాబట్టి.. హై బీపీతో బాధపడేవారికి బాదం మేలు చేస్తుంది. కొన్ని అధ్యయనాల ప్రకారం.. బాదం శరీరంలోని చెడు కొవ్వు (ఎల్ డి ఎల్)ను తగ్గిస్తుంది. ఇందులో ఉండే విటమిన్-ఇ, మెగ్నీషియం, పోటాషియంలు రక్త నాళాల్లో ప్రవాహం సక్రమంగా పనిచేసేలా చేస్తాయి. దీనివల్ల గుండె కూడా ఆరోగ్యంగా ఉంటుంది.

మేలైన యాంటిఆక్సిడెంట్లు :
బాదంలో మేలైన యాంటీఆక్సిడెంట్లు ఉంటాయి. దీని వల్ల మంట, ఆక్సీకరణ ఒత్తిడి నుంచి ఉపశమనం లభిస్తుంది. క్యాన్సర్ ముప్పు నుంచి బాదం గట్టెక్కిస్తుంది. అలాగే మిమ్మల్ని యవ్వనంగా కూడా ఉంచుతుంది. విటమిన్-ఏ అధికంగా ఉండే యాంటీఆక్సిడెంట్లు శరీరంలో కొత్త కణాల పెరుగుదలకు తోడ్పడతాయి. అల్జిమర్ల సమస్య నుంచి కూడా బాదం కాపాడుతుంది. బాదంపై ఉండే గోదుమ పొట్టులో అత్యధిక యాంటీఆక్సిడెంట్లు ఉంటాయట.

డయాబెటీస్ బాధితులకూ మంచిదే:
మధుమేహం ఉన్నవారు ఆహార నియమాలు తప్పకుండా పాటించాలి. ఎందుకంటే.. కొన్ని ఆహారాల వల్ల రక్తంలో చక్కెర స్థాయిలు పెరిగిపోయే ప్రమాదం ఉంది. అయితే, బాదం వల్ల మేలే తప్పా ఎలాంటి కీడు ఉండదు. బాదంలో పిండి పదార్థం తక్కువ. ఫైబర్ శాతం ఎక్కువ. కాబట్టి.. రక్తంలో గ్లూకోజ్ స్థాయిల నియంత్రణకు బాదం బాగానే పనిచేస్తుంది. ఇందులో మెగ్నీషియం శాతం ఎక్కువగా ఉంటుంది. ఇది కూడా బ్లడ్ షుగర్ స్థాయిలను నియంత్రణలో ఉంచడమే కాకుండా ఇన్సులిన్ ప్రక్రియ సక్రమంగా సాగేందుకు దోహదం చేస్తుంది. డయాబెటీస్ బాధితుల్లో మెగ్నీషియం లోపాన్ని బాదంతో భర్తీ చేయొచ్చు. బాదం తినేవారిలో టైప్-2 డయాబెటీస్, మెటాబాలిక్ (జీవక్రియ) సిండ్రోమ్ తదితర సమస్యలు అదుపులో ఉన్నట్లు కొన్ని అధ్యయనాల్లో గుర్తించారు. బాదం ఆకలిని అదుపులో ఉంచుతుంది. ఫలితంగా ఎక్కువ క్యాలరీలు తీసుకొనే అవకాశం ఉండదు. బరువు తగ్గేందుకు ప్రయత్నించేవారికి కూడా బాదం మంచిదే. బాదం ఒత్తిడిని కూడా తగ్గిస్తుంది.

ఎముకలకు మంచిది:
బాదం ద్వారా శరీరంలో కాల్షియాన్ని సైతం పెంపొందించుకోవచ్చు. ఇకపై మీరు కాల్షియం శాతాన్ని పెంచుకోవాలని భావిస్తే.. బాదం పప్పులను తినడం అలవాటు చేసుకోండి. ఎందుకంటే పాలల్లో ఉన్నట్లే బాదంలో కూడా నాలుగో వంతు కాల్షియం స్థాయిలు ఉంటాయి. దీని వల్ల మీ ఎముకలు బలోపేతమవుతాయి. విరిగిపోకుండా స్ట్రాంగ్‌గా ఉంటాయి. బాదంలో పాస్పరస్ శాతం కూడా అధికం. ఇది మీ శరీరంలోని ఎముకలను ఆరోగ్యంగా ఉంచుతుంది.

రోజుకు ఎన్ని బాదం పప్పులు చాలు?:
శరీరానికి మేలు చేస్తుంది కదా అని.. ఏదీ అతిగా తీసుకోకూడదు. ఈ సూత్రం బాదంకు కూడా వర్తిస్తుంది. బాదంలు మోతాదుకు మించి తింటే కొత్త సమస్యలు వచ్చిపడతాయి. ఆహార నిపుణుల సూచన ప్రకారం.. రోజుకు 8 నుంచి 10 బాదం పప్పులు తింటే చాలు. బరువు తగ్గేందుకు, కండలు పెంచేందుకు, జుట్టు బాగా పెరిగేందుకు ఈ మోతాదు సరిపోతుంది. అయితే, బాదంను నేరుగా తినేయకుండా నీటిలో 7 నుంచి 8 గంటలు నానబెట్టి, తొక్క తీసి తినడం మంచిది. నానబెట్టడం వల్ల పోషకాలు వేగంగా శరీరానికి అందుతాయి.

అతిగా బాదం తింటే:
బాదం ఆరోగ్యానికి మంచిది కదా అని అధికంగా తినడం మొదలుపెడితే.. మొదటికే మోసం. బాదం కొవ్వులను పెంచే అవకాశం ఉంది. బాదం అతిగా తింటే శ్వాస తీసుకోవడం కష్టం కావచ్చు. శరీరంలో విషతుల్యాలను పెంచవచ్చు, మిమ్మల్ని ఉక్కిరి బిక్కిరి చేయొచ్చు. జీర్ణక్రియ సమస్యలు పెరుగుతాయి.

Send a Comment

Your email address will not be published.