ఇతర భాషల్లో హిట్ అయిన సినిమాల్ని తీసుకుని వాటిని తెలుగులో రొటీన్ ఫార్ములాతో రీమేక్ చేయడంలో మన దర్శకులు సిద్ధహస్తులు. ఇదే విషయాన్ని గురువారం రిలీజైన మిస్టర్ బచ్చన్ మరోసారి రుజువు చేసింది. అజయ్ దేవగణ్‌ నటించిన రెయిడ్ సినిమాని హరీష్ శంకర్ రీమేక్ చేసి రవితేజ హీరోగా ఈ సినిమాని ప్రేక్షకుల ముందుకు తీసుకొచ్చాడు.
కథ
మిస్టర్ బచ్చన్ (రవితేజ) నిజాయితీ గల ప్రభుత్వ అధికారి. ఇన్ కం ట్యాక్స్ ఆఫీసర్‌గా మిస్టర్ బచ్చన్ ఎన్నో రైడ్స్ చేసి ఎన్నో వందల కోట్ల నల్లధనాన్ని వెలికి తీస్తాడు. అలాంటి మిస్టర్ బచ్చన్‌ను ఓ రైడ్ వల్ల విధుల నుంచి తొలగిస్తారు. ఆ తరువాత మిస్టర్ బచ్చన్ తన సొంతూరికి వెళ్లి ఆర్కెస్టాను రన్ చేస్తుంటాడు. ఊర్లో జిక్కీ (భాగ్య శ్రీ)ని చూసి తొలి చూపులోనే ప్రేమలో పడతాడు. మరో వైపు ముత్యం జగ్గయ్య (జగపతి బాబు) అరాచకాలు మితి మీరి పోతుంటాయి. తన మీదకు వచ్చే ప్రభుత్వ అధికారుల్ని, ఎదురు తిరిగిన వారిని హత మార్చుతుంటాడు. అలాంటి ముత్యం జగ్గయ్య మీదకు మిస్టర్ బచ్చన్ లాంటి వాడ్ని ఐటీ రైడ్స్‌కు పంపిస్తారు. ముత్యం జగ్గయ్యను మిస్టర్ బచ్చన్ ఎలా ఎదుర్కొంటాడు? ముత్యం జగ్గయ్య ఇంట్లోని నల్లధనాన్ని మిస్టర్ బచ్చన్ పట్టుకుంటాడా? మిస్టర్ బచ్చన్‌ను ఎదుర్కొనేందుకు ముత్యం జగ్గయ్య ఏం చేస్తాడు? ఈ కథలో జిక్కీ పాత్ర ఏంటి? అసలు చివరకు ఏం జరిగింది? అన్నది కథ.
మిస్టర్ బచ్చన్ చిత్రం.. అజయ్ దేవగణ్‌ రెయిడ్ సినిమాకు రీమేక్ అన్న సంగతి తెలిసిందే. హరీష్ శంకర్ ఓ రీమేక్‌ను ఎలా హ్యాండిల్ చేస్తాడో అందరికీ తెలిసిందే. ఒరిజినల్ సినిమాలోని సారాన్ని మాత్రమే తీసుకుని.. తెలుగు ప్రేక్షకులకు ఏం కావాలో అది యాడ్ చేస్తుంటాడు. మాస్ మసాలా అంశాలను జొప్పించి.. హీరోయిన్ ట్రాక్‌ను మాస్ ఆడియెన్స్‌కు నచ్చేలా డిజైన్ చేస్తాడు. ఓ నాలుగు ఫైట్లు, ఐదు మంచి సాంగ్స్.. ఓ పది పంచ్ డైలాగ్స్ రాసుకుంటాడు.
రెయిడ్ సినిమాను చూడకుండా ఉంటే.. మిస్టర్ బచ్చన్ చూసి ఉంటే.. ఓ మోస్తరుగా నచ్చేస్తుంది. ఒక వేళ రైడ్ చూసి ఉంటే.. మిస్టర్ బచ్చన్ పొరబాటున కూడా చూడకూడదేమో. రైడ్ సీరియస్‌గా సాగితే.. మిస్టర్ బచ్చన్ సిల్లీగా సాగుతుంది. నవ్వించాలని హరీష్ శంకర్ చేసిన ప్రయత్నాలు నవ్వుల పాలు అయినట్టుగా కనిపిస్తుంది. అన్నపూర్ణ ట్రాక్ క్రింజ్‌గా అనిపిస్తే.. సత్య ట్రాక్ ఏమో.. మిరపకాయ్‌లో సునీల్ ట్రాక్‌ను గుర్తుకు తెస్తుంటుంది.
ఇక హీరోయిన్ ట్రాక్‌ను అయితే కేవలం గ్లామరస్ కోసమే వాడుకున్నాడు. ఆమె డబ్బింగ్ కూడా అంతగా నచ్చకపోవచ్చు. తెరపై పాటల్ని అద్భుతంగా పిక్చరైజ్ చేయించుకున్నాడు. సింగిల్ స్క్రీన్స్‌లో పాటలకు ఆడియెన్స్ ఊగిపోయేలానే ఉన్నాయి.
ఒక ఫార్మూలా మాదిరిగా.. లవ్ ట్రాక్.. కామెడీ ట్రాక్.. విలన్ ట్రాక్.. అంటూ ఇలా లెక్కలేసుకుని మరీ సీన్లను డివైడ్ చేసి.. అతికించినట్టుగా అనిపిస్తుంది. అయితే ఏ ట్రాక్ కూడా అంతగా కనెక్ట్ కాకపోవచ్చు. గబ్బర్ సింగ్‌లో హరీష్ శంకర్ చేసిన మ్యాజిక్ ఇక్కడ కనిపించదు. ఇది అవుట్ డేటెడ్ రీమేక్, స్క్రీన్ ప్లేగా అనిపిస్తుంది.
హరీష్ శంకర్ తన టెక్నికల్ టీంను బాగా వాడుకున్నాడు. మిక్కీ జే మేయర్ ఆర్ ఆర్ తమన్ స్థాయిలో ఇచ్చాడు. విజువల్స్ అద్భతుంగా ఉంటాయి. కానీ అది ఏ పీరియాడిక్ అని, ఏ టైం పీరియడ్ అని, ఆ కాస్టూమ్స్ ఏంటి? అని మాత్రం అడిగితే కష్టమే. అన్నీ కల్పితమే అని ముందే చెప్పాడు. ఇక అడగడానికి కూడా ఏమీ ఉండదు. కమర్షియల్ సినిమాకు లెక్కలేంటి? అని అడిగితే కూడా కష్టమే. అయితే హరీష్ శంకర్ కొన్ని చోట్ల మంచి మాటలు రాస్తే.. ఇంకొన్ని చోట్ల దారుణమైన బూతులు వచ్చేలా పంచ్ డైలాగ్స్ రాసి వదిలేశాడు. ఆ తర్వాత డైలాగ్స్ ఏంటో ప్రేక్షకుడికి వదిలేశాడు.
రవితేజ లుక్స్, ఎనర్జీ బాగుంటుంది. తణికెళ్ల భరణి, సచిన్ ఖేదేకర్ పాత్రలు పర్వాలేదనిపిస్తాయి. జగపతి బాబు విలనిజం రొటీన్‌లా అనిపిస్తుంది. సత్య కామెడీ కొన్ని చోట్ల నవ్విస్తుంది. చమ్మక్ చంద్ర, రోహిణి, అన్నపూర్ణ పాత్రలు విసిగిస్తాయి. సిద్దు జొన్నలగడ్డ స్పెషల్ ఎంట్రీ ఓకే అనిపిస్తుంది.. కానీ లాజిక్ లెస్‌గా ఉంటుంది. ఎండ్ కార్డ్ పడక ముందే థియేటర్లో ప్రేక్షకులు బయటకు వచ్చేస్తున్నారంటే.. సినిమాను ఎలా తీసి ఉంటాడో అర్థం చేసుకోవచ్చు.