సెన్సేషనల్ డైరక్టర్ శంకర్, గ్లోబల్ స్టార్ రామ్ చరణ్ కాంబోలో వచ్చిన లేటెస్ట్ మూవీ గేమ్ ఛేంజర్ జనవరి10న భారీ అంచనాల మధ్య విడుదలైంది. ఈ సినిమా ఎలా ఉందంటే….?
ఒక నిజాయితీ గల ఐఏఎస్ ఆఫీసర్‌కి అవినీతి పరుడైన మంత్రికి మధ్య జరిగే పోరే ‘గేమ్ ఛేంజర్’. ఒక ఐఏఎస్ అధికారి.. తన అధికారాన్ని ఉపయోగించి రాజకీయ వ్యవస్థను ఏవిధంగా ప్రభావితం చేయొచ్చు? సొసైటీలో ఎలాంటి మార్పులు తీసుకుని వచ్చాడనేదే గేమ్ ఛేంజర్ అసలు కథ. ఆంధ్రప్రదేశ్ ముఖ్యమంత్రి బొబ్బిలి సత్యమూర్తి (శ్రీకాంత్)తో గేమ్ ఛేంజర్ కథ మొదలౌతుంది. అడ్డదారిలో సీఎం అయ్యి.. అవినీతికి అడ్రస్‌గా మారిన సత్యమూర్తిలో పశ్చాత్తాపం కలుగుతుంది. తన పదవీకాలం చివరి ఏడాదిలో రాష్ట్రంలో ఎలాంటి అవినీతి ఉండకూడదని నిశ్చియించుకుంటాడు. అయితే అతని మంత్రివర్గంలో ఉన్న కొడుకులు మోపిదేవి (ఎస్.జే సూర్య), రామచంద్రరెడ్డి (జయరాం)లు విభేదిస్తారు. చివరికి తండ్రినే చంపేసి.. సీఎం కావాలని అనుకుంటాడు మోపిదేవి. ఆ తరుణంలో సొంత ఊరు వైజాగ్‌కి కలెక్టర్‌గా అడుగుపెడతాడు రామ్ నందన్ (రామ్ చరణ్).
వచ్చీ రావడంతోనే అవినీతి ప్రభుత్వంపై ఉక్కుపాదం మోపి.. మోపిదేవి ఆట కట్టిస్తాడు. అనూహ్య పరిస్థితుల్లో సత్యమూర్తి.. రామ్ నందన్‌ని రాష్ట్ర సీఎంగా ప్రకటిస్తాడు. అసలు రామ్ నందన్ ఎవరు? అతని గతం ఏంటి? అభ్యుదయం పార్టీకి సత్యమూర్తికి ఉన్న సంబంధం ఏంటి? రామ్ నందన్‌ని ఎందుకు సీఎంగా ప్రకటించాడు? అప్పన్న (రామ్ చరణ్)కి రామ్ నందన్‌కి ఉన్న రిలేషన్ ఏంటి అన్నదే అసలు కథ.
లంచగొండుల ఆట కట్టిస్తూ శంకర్ తీసిన జెంటిల్‌మెన్, ఒకేఒక్కడు, భారతీయుడు, అపరిచితుడు చిత్రాల్లో కథానాయుడు అతి సామాన్యుడే. ఆ సామాన్యుడి తిరుగుబాటే శంకర్ చిత్రాలకు మూలం. కానీ ‘గేమ్ ఛేంజర్’ శంకర్ కథలకు భిన్నంగా సాగిన కథ. ఈ కథలో కథానాయకుడు పవర్ ఫుల్ ఐఏఎస్ ఆఫీసర్. బ్యూరోక్రసీ వర్సెస్ పొలిటికల్ బాసిజం నేపథ్యంలో సాగిన ఎమోషనల్ డ్రామా ‘గేమ్ ఛేంజర్’.
‘గేమ్ ఛేంజర్’కి ఫ్లాష్ బ్యాక్ కథే కీలకం. అప్పన్నగా రామ్ చరణ్ పంచెకట్టు క్యారెక్టర్ ‘గేమ్ ఛేంజర్‌కి సోల్ ఆఫ్ ది మూవీ. ఓ గొప్ప సందేశాన్ని ఇస్తూ.. అంతకంటే గొప్పగా ఎమోషనల్ కనెక్టివిటీతో అద్భుతంగా సినిమా తీయడంలో శంకర్ నేర్పరి. గత కొన్నాళ్లుగా ఆ మార్క్‌ని మిస్ అవుతున్న శంకర్.. ‘గేమ్ ఛేంజర్’ బౌన్స్ బ్యాక్ అయ్యే ప్రయత్నంలో సగం మాత్రమే సక్సెస్ అయ్యారు.
ప్రతి ఒక్కరి జీవితంలో విమర్శల్ని ఎదుర్కోవాల్సిందే. వాటి నుంచి తప్పించుకోలేము. ఎవరు ఎవర్నైనా.. ఎందుకోసమైనా విమర్శించొచ్చు. కానీ వాటి నుంచి ఏం నేర్చుకున్నారన్నదే ముఖ్యం. విమర్శల్ని సవాలుగా తీసుకుని మెరుగుపరుచుకున్నవాడే ‘గేమ్ ఛేంజర్’ అవుతాడు. దర్శకుడు శంకర్ కూడా అలాంటి గేమ్ ఛేంజింగ్ మూమెంట్ కోసం.. తన సొంత కథల్ని పక్కన పెట్టి కార్తీక్ సుబ్బరాజు ఇచ్చిన కథతో ‘గేమ్ ఛేంజర్’ని రూపొందించారు.
సీఎం.. మంత్రి మండలి.. ఎలక్షన్ కమిషన్.. ఐఏఎస్‌లు.. ఐపీఎస్‌లు.. ఇలా భారీ సెటప్‌తో ‘గేమ్ ఛేంజర్’ని భారీ హంగులతో చూపించారు. శంకర్ మార్క్ సందేశం, విజువల్స్, రిచ్ నెస్, ఎమోషనల్ కనెక్టివిటీ, ఫ్లాష్ బ్యాక్‌ను గుండెలకు హత్తుకునేలా మలిచిన తీరు శంకర్ ఈజ్ బ్యాక్ అనేట్టే అనిపించింది. సెకండాఫ్‌లో అప్పన్న పాత్రే ఈ గేమ్ చేంజర్‌కు ప్రాణం. ఆ పాత్రతోనే శంకర్ కావాల్సినంత సోషల్ మెసేజ్ ఇచ్చారు. అప్పన్న పాత్రను మల్చిన తీరు, ఆడియెన్స్‌ను కనెక్ట్ చేసిన తీరు బాగుంటుంది. అయితే ఏదో అద్భుతాన్ని ఆశించి.. గేమ్ ఛేంజర్‌కి వెళ్తే మాత్రం నిరాశ తప్పదు. కథ కూడా రొటీన్ ఫార్మేట్‌లోనే ఉంటుంది. ఆ రొటీన్‌కి తగ్గట్టుగా.. లాజిక్‌లు లేని చిత్ర విచిత్రాలు గేమ్ ఛేంజర్‌లో చాలానే ఉంటాయి. ముగింపు కూడా పరమరొటీన్ మాత్రమే కాకుండా వాస్తవ దూరంగా అనిపిస్తుంది. ఫ్లాష్ బ్యాక్‌లో మైనింగ్‌పై అప్పన్న పోరాటం.. పొలిటికల్ ఎంట్రీ.. జీరో బడ్జెట్ పాలిటిక్స్ కాన్సెప్ట్‌తో ఎదురైన సవాళ్లు ప్రతి సవాళ్లు డ్రామా తెరపై పండింది. ఎప్పుడైతే అప్పన్న ఎపిసోడ్ ముగిసిందో అప్పటి నుంచి కథనం గాడి తప్పింది. శానన సభ వ్యవస్థ, ముఖ్యమంత్రుల ఎంపిక నాటకీయంగా అనిపిస్తుంది.
ప్రతిపక్ష నాయకుడు వెళ్లి.. ఈవీఎంలు పగల కొట్టేస్తుంటే.. చీఫ్ ఎలక్షన్ కమీషనర్‌గా ఉన్న ఐఏఎస్ ఆఫీసర్ డిష్యూం.. డిష్యూం అని ఫైట్లు చేయడం.. ఆ ప్రతిపక్ష నాయకుడ్ని అడ్డుకోవడం లాంటివి వాస్తవ దూరం గా అనిపిస్తాయి. శంకర్ లాజిక్‌లతో సంబంధం లేకుండా మాస్ ఎలిమిమెంట్స్ కూడా నేలవిడిచి సాము చేసినట్టుగానే అనిపిస్తాయి కొన్ని సీన్లు. హెలికాప్టర్‌పై వచ్చి.. రైల్వే ట్రాక్‌పై కట్టిపడేసిన వాళ్ల కట్లు కత్తితో తెంచే సీన్ అయితే బోయపాటిని గుర్తు చేశారు శంకర్. ఆ ఎంట్రీ సీన్ కూడా హీరో ఎలివేషన్స్ కోసమే తప్ప.. కథతో సంబంధం లేదు. పాటల్లో కనిపించినంత దర్శకత్వ ప్రతిభ.. కథ, కథనాల్లో లోపించింది. కియారాతో కాలేజ్ లవ్ ట్రాక్.. ఇరికించినట్టే అనిపిస్తుంది తప్పితే కథకి కనెక్ట్ కాలేదు.
గేమ్ చేంజర్‌కు రామ్ చరణ్ నటన.. అందులోనూ అప్పన్న పాత్రగా పండించిన ఎమోషన్స్ కీలకం. స్టైలీష్‌గా డిఫరెంట్ లుక్స్‌లో రామ్ చరణ్ ఆకట్టుకుంటాడు. మళ్లీ తన కెరీర్ బెస్ట్ పర్ఫామెన్స్‌తో రామ్ చరణ్ అందరినీ మెప్పించాడు. ఇక అంజలి పాత్ర సెకండాఫ్‌కు హైలెట్ అయ్యింది. అప్పన్న భార్య పార్వతిగా కథని మలుపు తిప్పే పాత్రలో మెప్పించింది అంజలి. అంజలి కెరియర్‌కి మరో గేమ్ ఛేంజింగ్ మూవీ గేమ్ ఛేంజర్. కియారా హీరో కోపాన్ని కంట్రోల్ చేసే గ్లామర్ డాల్‌ పాత్రకి పరిమితం అయ్యింది.
రాష్ట్ర సీఎంగా శ్రీకాంత్‌కి ఈ సినిమాలో కీ రోల్ పడింది. ప్రతినాయకుడిగా ఎస్‌జే సూర్య.. విలక్షణ నటనతో ఆకట్టుకున్నాడు. ఎస్ జే సూర్య మేనరిజం కొత్తగా ఉంటుంది. ఒక్క పాత్రేకానీ చాలా వేరియేషన్ చూపించారు. గుండు లుక్‌లో విలనిజం పండించారు. అయితే ఆయన నటించిన గత చిత్రాల తాలూకు ఛాయలు కనిపిస్తుంటాయి. సైడ్ సత్యంగా సునీల్ నవ్వించే ప్రయత్నం చేశారు కానీ పెద్దగా ఆకట్టుకోలేదు. జయరాం, సముద్రఖనిలకు ఇంపార్టెంట్ రోల్స్‌లో కనిపించారు. వెన్నెల కిషోర్, పృథ్వీ, నరేష్, బ్రహ్మానందం, రఘుబాబు, శుభలేఖ సుధాకర్. వైవా హర్ష ఇలా చాలామంది ఉన్నారు కానీ.. వాళ్లంతా ప్యాండింగ్ ఆర్టిస్ట్‌లుగా మాత్రమే కనిపించారు. పెద్ద ప్రాధాన్యత లేదు.
శంకర్ సినిమాలు అంటేనే టెక్నికల్‌గా హై స్టాండర్డ్స్‌లో ఉంటాయి. గేమ్ ఛేంజర్‌లో సాంగ్స్ పిక్చరైజేషన్ అయితే అద్దిరిపోయింది. జరగండి పాటలో కనిపించే విలేజ్ సెట్ కనువిందు చేస్తుంది. దోప్ సాంగ్ కూడా భారీ సెట్‌తో తీర్చిదిద్దారు. ఇక ఈ గేమ్ చేంజర్‌కు దిల్ రాజు పెట్టిన ప్రతీ పైసా తెరపై రిచ్‌గా కనిపిస్తుంది. శంకర్ విజన్, తిరు కెమెరా వర్క్, సెట్ వర్క్, వీఎఫ్ఎక్స్ ఇలా అన్నీ అద్భుతంగా ఉంటాయి. సాయి మాధవ్ బుర్రా మాటలు ఆలోచింపజేసేలా ఉంటాయి.
ఈ మూవీలో సాలిడ్ నరేషన్ ఉంది కానీ ఈ తరహా కథలు కొత్తేమి కాదు. ఫస్టాఫ్ లో మొదటి పది పదిహేను నిమిషాలు కొంచెం సో సో గానే ఉంటుంది. ఇంకా శంకర్ మార్క్ స్టైలిష్ యాక్షన్ టేకింగ్ కూడా సినిమాలో మిస్ అయ్యినట్టు తన ఫ్యాన్స్‌కి అనిపించవచ్చు. కామిడీ అంతగా లేకపోవడం కూడా సినిమాకు పెద్ద మైనస్ పాయింట్‌గా చెప్పవచ్చు.
నటులు:రామ్ చరణ్,కియారా అద్వానీ,ఎస్ జే సూర్య,శ్రీకాంత్,అంజలి
దర్శకుడు: శంకర్