మెగాస్టార్ చిరంజీవి టైటిల్ పాత్రలో నటిస్తోన్న చిత్రం ‘భోళా శంకర్’. మెహర్ రమేష్ దర్శకత్వంలో రామబ్రహ్మం సుంకర ఈ చిత్రాన్ని నిర్మిస్తున్నారు. ఆగ‌స్ట్ 11న వ‌ర‌ల్డ్ వైడ్‌గా ఈ సినిమాను రిలీజ్ చేయ‌టానికి మేక‌ర్స్ ప్లాన్ చేశారు. తాజాగా ఈ సినిమా నుంచి తొలి లిరిక‌ల్ సాంగ్‌ని రిలీజ్ చేశారు. ‘భోళా మానియా..’ అంటూ సాగే పాటలో అక్కడక్కడా చిరంజీవి మార్క్ స్టెప్స్‌ను గ‌మనించ‌వ‌చ్చు. హీరో ఇంట్ర‌డ‌క్ష‌న్ సాంగ్‌లా అనిపిస్తుంది. మ‌ణిశ‌ర్మ త‌న‌యుడు మహతి స్వర సాగర్ సంగీతం అందించిన ఈ పాట‌ను రామ జోగ‌య్య శాస్త్రి రాశారు. రీసెంట్‌గానే 200 మంది డాన్స‌ర్స్‌తో ఈ పాట‌ను చిత్రీక‌రించారు. చిరంజీవితో మహతి స్వర సాగర్ పని చేస్తున్న తొలి సినిమా ఇది.
త‌మిళ చిత్రం ‘వేదాళం’కు రీమేక్‌గా ‘భోళా శంకర్’ రూపొందుతోంది. సిస్ట‌ర్ సెంటిమెంట్ ప్ర‌ధానంగా సాగే సినిమా. ఇందులో త‌మ‌న్నా భాటియా హీరోయిన్‌గా న‌టిస్తుంది. అలాగే చిరంజీవి చెల్లెలు పాత్రలో స్టార్ హీరోయిన్ కీర్తి సురేష్ క‌నిపించ‌నుంది. భారీ సెట్స్ వేసి ఈ సినిమాను చిత్రీక‌రిస్తున్నారు. సినిమా షూటింగ్ ఫైన‌ల్ స్టేజ్‌కు చేరుకుంటోంది.
ఈ ఏడాదిలో వాల్తేరు వీర‌య్య చిత్రంతో చిరంజీవి స‌క్సెస్‌ను సొంతం చేసుకున్నారు. దీని త‌ర్వాత వ‌స్తోన్న సినిమా కావ‌టంతో భోళా శంకర్ మూవీపై భారీ అంచ‌నాలు నెల‌కొన్నాయి. సైరా న‌ర‌సింహారెడ్డి సినిమా త‌ర్వాత చిరంజీవితో త‌మ‌న్నా క‌లిసి న‌టించిన చిత్ర‌మిది. ఈ సినిమా త‌ర్వాత చిరంజీవి చేయ‌బోయే నెక్ట్స్ మూవీపై ఇంకా ఎలాంటి అధికారిక ప్ర‌క‌ట‌న రాలేదు. మెగాస్టార్ మాత్రం క‌థ‌ల‌ను వింటున్నారు. త్వ‌ర‌లోనే అఫిషియ‌ల్ అనౌన్స్మెంట్ వ‌స్తుంద‌ని సినీ వర్గాలు భావిస్తున్నాయి.