పాన్ ఇండియా స్టార్ ప్రభాస్ ప్రస్తుతం ‘కల్కి 2898 ఏడీ’ సినిమాలో నటిస్తున్నారు. ప్రస్తుతం షూటింగ్ దశలో ఉన్న ఈ చిత్రం జూన్ 27న ప్రేక్షకుల ముందుకు రానుంది. ఈ చిత్రంలో విశ్వనటుడు కమల్ హాసన్, అమితాబ్ బచ్చన్ లాంటి దిగ్గజ యాక్టర్స్ నటిస్తున్న సంగతి తెలిసిందే. డైరెక్టర్ నాగ్ అశ్విన్ తెరకెక్కిస్తున్న ఈ భారీ చిత్రంలో దీపికా పదుకొణె, దిశా పటానీ కూడా నటిస్తున్నారు. సంతోష్ నారాయణన్ ఈ చిత్రానికి సంగీతం అందిస్తున్నారు. వైజయంతి మూవీస్ భారీ బడ్జెట్‌తో ఈ చిత్రాన్ని నిర్మిస్తోంది.
ఈ చిత్రంలో కమల్ హాసన్ ఓ అతిథి పాత్రలో నటిస్తున్నారు. ఈ విషయాన్ని ఓ ఇంటర్వ్యూలో స్వయంగా కమల్ హాసన్ చెప్పారు. అయితే ఈ రోల్ కోసం కమల్ హాసన్‌కి మేకర్స్ భారీ రెమ్యూనరేషన్ ఇచ్చినట్లు సమాచారం. ఈ చిత్రం తమిళంలో కూడా విడుదల అవుతుండటంతో కమల్ హాసన్ పాత్ర చాలా ముఖ్యమని కల్కి టీమ్ భావించిందట. అందుకే ఏమాత్రం వెనక్కి తగ్గకుండా కమల్కి అన్నీ కోట్లు ఇచ్చినట్లు తెలుస్తోంది. ఇక ఈ చిత్రంలో అమితాబ్ బచ్చన్ అశ్వత్థామ పాత్రలో నటిస్తున్నారు.
ఈ చిత్రం మే నెలలోనే రిలీజ్ కావాల్సి ఉంది. కానీ దేశంలో సార్వత్రిక ఎన్నికల హడావిడి ఉండటంతో కల్కిని వాయిదా వేయక తప్పలేదు. ఎన్నికల ఫలితాలు వచ్చేసి అంతా సెటిలైన తర్వాత జూన్ 27న చిత్రాన్ని రిలీజ్ చేస్తున్నారు. సినిమాపై ప్రభాస్ ఫ్యాన్స్ భారీ ఆశలే పెట్టుకున్నారు. ఖచ్చితంగా సినిమా హాలీవుడ్ లెవల్లో ఉంటుందని అంతా అంటున్నారు. ముఖ్యంగా చిత్రంలో గ్రాఫిక్స్ వర్క్ అదిరిపోతుందని ఫ్యాన్స్ నమ్మకంగా ఉన్నారు.