భగవంత్ కేసరిగా దసరాకు వస్తున్న బాలకృష్ణ
నందమూరి బాలకృష్ణ చెప్పే మాస్ డైలాగ్స్‌కు ఉండే క్రేజ్ అందరికీ తెలిసిందే. బాలయ్య డైలాగ్స్ చెబితే థియేటర్లు దద్దరిల్లిపోవాల్సిందే. అలాంటి మాస్ డైలాగ్స్, యాక్షన్ సీక్వెన్స్‌తో భగవంత్ కేసరి దుమ్ములేపేందుకు రెడీ అయ్యాడు. ఈ మూవీని అనిల్ రావిపూడి మరింత మాసీగా తీసినట్టు కనిపిస్తోంది. తాజాగా రిలీజ్ చేసిన ట్రైలర్ చూస్తుంటే బాలయ్యను కొత్త కోణంలో చూపించినట్టుగా అనిపిస్తోంది. బాలయ్య పాట పాడితే వచ్చిన ట్రోలింగ్ మీద ఇప్పుడు భగవంత్ కేసరి సినిమాలో సెటైర్లు వేసినట్టుగా కనిపిస్తోంది.
ఇక ఈ ట్రైలర్‌లో బాలయ్య చెప్పిన డైలాగ్స్ అదిరిపోయాయి. సోషల్ మీడియాలో ఎక్కువగా ట్రెండ్ అయిన వాటినే వాడేశారు. కేసీపీడీ, పిల్ల మొగ్గ అంటూ కాస్త అడల్ట్ డైలాగ్స్ రాసేశాడు అనిల్ రావిపూడి. ఇక బాలయ్య ఈ ట్రైలర్‌లో చివర్లో చెప్పిన డైలాగ్, దానికి ముందు పాడిన పాట హైలెట్ అవుతోంది. ఎట్ల పాడిన పాట అని బాలయ్య అనడం.. బాగుందని విలన్లు మొహమాటంగా చెప్పడం.. ఎట్లున్నా పాడుతా అని బాలయ్య ముగించడం అదిరిపోయిందని అభిమానులు ఆనందపడుతున్నారు. బిడ్డ ముందు తండ్రి నిలబడితే.. ఆడే వంద దేవుళ్ల లెక్క.. సప్పుడు సేయకు.. పిల్లమొగ్గ.. అడవి బిడ్డ.. నేలకొండ.. భగవంత్ కేసరి.. అంటూ ఇలా ఎన్నో పవర్ ఫుల్ డైలాగ్స్ ఇందులో ఉన్నాయి. ఇక బిడ్డ కోసం తండ్రి పడే ఆరాటం.. చేసే పోరాటమే భగవంత్ కేసరి అన్నది ట్రైలర్ చూస్తే అర్థం అవుతోంది. ఇందులో మహిళ కోణంలో ఏదో సమస్యను చూపించబోతోన్నట్టుగా కనిపిస్తోంది.
భగవంత్ కేసరి సినిమా అక్టోబర్ 19న దసరాకు బరిలో దిగబోతోంది. ఈ క్రమంలోనే ట్రైలర్ లాంచ్ ఈవెంట్‌ను వరంగల్‌లో గ్రాండ్‌గా నిర్వహించారు. ఇక ఈ ట్రైలర్ కాస్త రొటీన్‌గానే ఉన్నా కూడా ఫ్యాన్స్‌కు మాత్రం పిచ్చెక్కించేలా ఉంది. ఈ సారి కూడా అనిల్ రావిపూడి హిట్టు కొట్టేలానే కనిపిస్తోంది. కామెడీ, యాక్షన్, పవర్ ఫుల్ డైలాగ్స్‌తో భగవంత్ కేసరి అన్ని వర్గాలను ఆకట్టుకునేలా ఉంది.