పొలిటికల్ థ్రిల్లర్‌గా తెరకెక్కిన ‘బాణం’ మూవీతో హీరోగా ఎంట్రీ ఇచ్చిన నారా రోహిత్ ఆ తర్వాత కథా వైవిధ్యమున్న చిత్రాల్లోనే ఎక్కువగా నటించారు. కమర్షియల్ అంశాలు, హీరోయిజం పేరుతో కథ పక్కదారి పట్తకుండా చాలా జాగ్రత్తలు తీసుకునేవారు. ఈ క్రమంలోనే ‘సోలో, ప్రతినిధి, రౌడీ ఫెలో, అప్పట్లో ఒకడుండేవాడు’ వంటి హిట్ చిత్రాలతో ప్రేక్షకులను మెప్పించాడు. అయితే మూడు నాలుగేళ్లుగా సినిమాలకు బ్రేక్ ఇచ్చిన రోహిత్.. తాజాగా తన 19వ చిత్రాన్ని ప్రకటించారు. ప్రముఖ జర్నలిస్ట్ మూర్తి దర్శకత్వం వహించనున్న ఈ చిత్ర టైటిల్‌తో పాటు ఫస్ట్ లుక్ పోస్టర్‌‌ను తాజాగా విడుదల చేశారు.
2014లో రోహిత్ నటించిన ‘ప్రతినిధి’ చిత్రానికి సీక్వెల్‌గా ఈ ప్రాజెక్ట్ తెరకెక్కనుంది. ‘ప్రతినిధి 2’ టైటిల్‌తో పాటు ఫస్ట్ లుక్ పోస్టర్ విడుదల చేశారు. ఈ సందర్భంగా ట్వీట్ చేసిన నారా రోహిత్.. ‘నా నెక్ట్స్ మూవీ ‘ప్రతినిధి2’ ఫస్ట్ లుక్ ఇదిగో. మూర్తి గారు అద్భుతమైన స్క్రిప్ట్‌ రూపొందించారు. ఈ మూవీ షూటింగ్ ప్రారంభించడానికి ఆసక్తిగా ఎదురు చూస్తున్నాను’ అని పేర్కొన్నారు. అంతేకాదు 2021 జనవరి 25న ఈ చిత్రం విడుదల కానుందని తెలిపారు.
ఇక జర్నలిస్ట్ మూర్తి సైతం ట్విట్టర్ వేదికగా ఈ మూవీ గురించి తన అభిప్రాయాన్ని పంచుకున్నారు. ‘జర్నలిస్ట్ గా నా మదిలో మెదిలిన ఒక ఆలోచనను కథగా మార్చాను. ఆ కథని నమ్మి నన్నే దర్శకత్వం చెయ్యమన్నారు. నా మొదటి సినిమా హీరో నారా రోహిత్. హీరో పుట్టిన రోజు సందర్భంగా ఫస్ట్ లుక్ పోస్టర్ రిలీజ్ చేస్తున్నాం. నా 30 ఏళ్ల జర్నలిజం జీవితంలో నేను వేసే ప్రతి అడుగులో నాకు తోడుగా ఉంటున్నారు. ఇప్పుడు వేసే ఈ అడుగులోనూ తోడుగా ఉంటారని ఆశిస్తూ’ అని ట్వీట్ చేశారు.
ఫస్ట్ లుక్ విషయానికొస్తే.. నారా రోహిత్ రూపాన్ని వార్తాపత్రికలతో రూపొందించిన ఈ పోస్టర్ ఆసక్తికరంగా ఉంది. అంతేకాదు ఈ మూవీ ఒక సామాజిక అంశంతో తెరకెక్కుతోందని పోస్టర్ చూస్తే అర్థమవుతోంది. దీంతో సినిమాపై ప్రేక్షకుల అంచనాలు పెరిగాయి. కాగా.. వానర ఎంటర్‌టైన్‌మెంట్స్ బ్యానర్‌పై కుమార్‌రాజా బత్తుల, ఆంజనేయులు శ్రీ తోట, కొండకళ్ల రాజేందర్‌ రెడ్డి ఈ చిత్రాన్ని నిర్మించనున్నారు. మహతి స్వర సాగర్ సంగీతం అందించనున్నారు. మిగిలిన నటీనటుల వివరాలు త్వరలో ప్రకటించనునారు.