యంగ్ హీరో కిరణ్ అబ్బవరం కిరణ్ అబ్బవరం, కశ్మీర పర్దేశి జంటగా నటించిన చిత్రం ‘వినరో భాగ్యము విష్ణు కథ’. అల్లు అరవింద్ సమర్పణలో జీఏ2 పిచ్చర్స్ బ్యానర్‌పై బన్నీ వాసు ఈ చిత్రాన్ని నిర్మిస్తున్నారు. ఈ సినిమా ద్వారా మురళీ కిషోర్ అబ్బూరు దర్శకుడిగా పరిచయమవుతున్నారు. ఫిబ్రవరి 17న ఈ చిత్రం విడుదలకు సిద్ధమవుతోంది. ఇప్పటికే విడుదలైన టీజర్, పాటలు ప్రేక్షకులను ఆకట్టుకున్నాయి. విడుదల తేదీ దగ్గరపడుతుండటంతో ప్రచారంలో భాగంగా సినిమా ట్రైలర్‌ను మంగళవారం విడుదల చేశారు. హైదరాబాద్‌లో జరిగిన ట్రైలర్ లాంచ్ ఈవెంట్‌కు సుప్రీం హీరో సాయిధరమ్ తేజ్ ముఖ్య అతిథిగా హాజరయ్యారు.
ఇక ట్రైలర్ విషయానికి వస్తే.. 2.25 నిమిషాల నిడివితో ఉన్న ట్రైలర్లో సినిమా ఎలా ఉండబోతోందో చూపించారు. ఇరుగుపొరుగు మనుషులు మాదిరిగా.. ఇరుగుపొరుగు ఫోన్ నంబర్ల కాన్సెప్ట్‌తో ఈ సినిమా నడవనుంది. హీరోయిన్ తన ఫోన్ నంబర్‌కు ముందు నంబర్, వెనుక నంబర్‌కు ఫోన్ చేసి ఫ్రెండ్‌షిప్ చేస్తుంది. ఒక ఫోన్ నంబర్ హీరోది అయితే.. మరో ఫోన్ నంబర్ మురళీ శర్మది. ఈ ఫోన్‌నైబరింగ్ కాన్సెప్ట్‌తో దర్శకుడు వినోదాన్ని పండించడానికి ప్రయత్నించినట్టు ట్రైలర్లో కొన్ని సన్నివేశాలు చూస్తుంటే అర్థమవుతోంది.
అయితే, ట్రైలర్లో ఈ కాన్సెప్ట్ ఒక్కటే కొత్తగా కనిపిస్తోంది. ఆ తరవాత హీరోయిన్‌కు ఏదో కష్టం రావడం.. దాన్ని ఎదుర్కోవడానికి హీరో దిగడం జరిగినట్టు ట్రైలర్ బట్టి తెలుస్తోంది. దీనికి హీరోయిన్ చూపించిన ఫోన్‌నైబరింగ్ కాన్సెప్ట్‌నే హీరో వాడుకుంటాడని అర్థమవుతోంది. ‘‘మనకు కష్టం వస్తే ఎవరో సాయం చేయాల్సిన అవసరం లేదు. పక్కనోళ్లు చేస్తే చాలు. ఎవరికి తెలుసు నీ పక్క నంబరే సీఎందో, పీఎందో, సచిన్‌దో, ధోనిదో, పవర్ స్టార్.. ఐకాన్ స్టార్.. రెబల్ స్టార్‌ది కూడా అయ్యుండొచ్చు.. అలాంటివాళ్లలో ఒక్కరికి ఈ వీడియో రీచ్ అయినా నాకు కచ్చితంగా మంచే జరుగుతుంది’’ అనే డైలాగ్ సినిమా కాన్సెప్ట్ ఏంటో స్పష్టం చేస్తోంది.
ఈ సినిమాలో హీరో పేరు విష్ణు. ఊరు తిరుపతి. అందుకే టైటిల్ కూడా ‘వినరో భాగ్యము విష్ణు కథ’ అని అన్నమయ్య కీర్తన నుంచి తీసుకున్నారు. ఈ చిత్రానికి చైత‌న్ భరద్వాజ్ సంగీతం సమకూరుస్తున్నారు. మార్తాండ్ కె వెంకటేష్ ఎడిటర్. విశ్వాస్ సినిమాటోగ్రఫీ అందించారు. మురళీ శర్మ, ప్రవీణ్, శుభలేఖ సుధాకర్ తదితరులు ఇతర పాత్రల్లో నటించారు.