ఫాంటసీ కథలు సినిమాలుగా తీయడం, అధునాతన గ్రాఫిక్స్ వంటివి జోడించి ప్రేక్షకుల్ని ఆకట్టుకోవడం తెలుగు సినీ పరిశ్రమలో ఇటీవలికాలంలో ఎక్కువైంది. ఆ జీనర్ లో వచ్చిన తాజా చిత్రం ‘రాకాస’. ఈ మూవీ విశేషాలు.
కథ:
ఒక ఊరిలో ఊరిలో పెద్ద కోట.. ఆ కోటలో ‘రాకాస’ దెయ్యం.. ఆ దెయ్యం వెనుక జనాల్ని వేటాడి వెంటాడే కథ. అసలు ఆ కోటలో ఏముంది? కోటలోకి వెళ్లిన వీరుడు వీరబాబు (పిరికోడు) ఏమయ్యాడు? అన్నదే ‘రాకాస’ కథా నేపథ్యం. ఇక మూల కథలోకి వెళ్లే.. ఇది వెయ్యేళ్ల క్రితం మొదలైన సోషియో ఫాంటసీ కథ. రాజుల కాలం నుంచి రాకవనం ఊరి చివర కోటలో ఉన్న భీకర బ్రహ్మరాక్షసుడు (రాకాస)కి నరబలి అర్పిస్తుండటం అనేది ఆ ఊరి ఆచారం. అలా కోటలోకి వెళ్లిన ఏ ఒక్కరూ తిరిగి బయటకు రారు. వెయ్యేళ్లుగా ఆ ఆచారం కొనసాగుతూనే ఉంటుంది. కోటలో ఉన్న రాక్షసుడు (రాకాస) నుంచి హెచ్చరికలు వచ్చిన ప్రతిసారీ ఓ నిండు ప్రాణాన్ని బలిగా పంపిస్తుంటారు. అలా ఓ పసిబిడ్డని కూడా బలికి పంపిస్తారు. ఒకవేళ బలి ఇవ్వకపోతే.. ఆ ఊరంతా మాయా వలయంలో ఉంటుంది. ఎవరూ ఊరు విడిచి బయటకు వెళ్లలేరు. బలి ఇవ్వకపోతే ఊరు మొత్తం నాశనం అయిపోతుందనే మూడనమ్మకంతో హెచ్చరికలు వచ్చిన ప్రతిసారి బలి అర్పిస్తుంటారు. ఆ రాకాసని అంతం చేయడానికి వెళ్లిన ఓ రాజు.. రాకాస చేతిలో చనిపోతాడు. అప్పటి నుంచి ఆ రాకాసకి ఎవరూ ఎదురుతిరగరు. ఆ కోటలో నిజంగానే రాక్షకుడు ఉన్నాడనే భయంతో ఎవరూ ఆ కోట వైపు వెళ్లరు. అయితే వెయ్యేళ్ల తరువాత 2026లో ఆ ఊరివాడైన వీరబాబు (సంగీత్ శోభన్) తన ప్రేయసి సుకన్యని వెతుక్కుంటూ వస్తాడు. తీరా అతను వచ్చేసరికి ఆమె వేరే వ్యక్తిని పెళ్లి చేసుకుని వీరబాబుని మోసం చేస్తుంది. ఆ బాధలో పూటుగా తాగి.. ఆ ఊరి వాడైన సోము (వెన్నెల కిషోర్) హత్యకేసులో ఇరుక్కుంటాడు. ఆ కేసు నుంచి బయటపడే పనిలో ఉండగా.. కోటలో ఉన్న‘రాకాస’ నుంచి మూడు హెచ్చరికలు వస్తాయి. ఊరి పెద్దలంతా కోటలోకి నరబలి పంపడానికి సిద్దపడతారు. వీరబాబు మిత్రుడైన బాలరాజు (గెటప్ శీను)ని కోటలోకి బలిగా పంపాలని తీర్మానం చేస్తారు. అయితే మిత్రుడ్ని కాపాడుకునే ప్రయత్నంలో అదంతా మూఢనమ్మకం అని బాలరాజు ఆర్పాల్సిన దీపాన్ని వీరబాబు ఆర్పేస్తాడు. దీపం ఎవరు ఆర్పితే వాళ్లే కోటలోకి వెళ్లాలనే నిబంధన ఉండటంతో.. వీరబాబుని బలిగా ఆ కోటలోకి పంపిస్తారు. అసలు ఆ కోటలోకి వెళ్లిన తరువాత వీరబాబు ఏం చేశాడు? అసలు ఆ రాకాస ఎవరు? సోము ఏమయ్యాడు? వీరబాబు పై మనసు పడ్డ సుబ్బలక్ష్మి (నయన్ సారిక) ఏం చేసింది? అసలు ఆ కోటలో రాక్షసుడు ఉన్నాడా? లేడా..? అన్నదే మిగిలిన కథ.
డిఫరెంట్ కాన్సెప్ట్ :
రాజ్యం, రాజ్యాలు, కోట.. ఆ కోటలో రాక్షసుడు.. వెయ్యేళ్ల కాలం నాటి సెటప్. ‘రాకాస’ సినిమా ఆరంభంలో ఈ భారీ సెటప్ అంతా చూస్తే దర్శకురాలు మానస శర్మ.. గట్టిగానే ప్లాన్ చేసిందే అనే ఫీల్ కలుగుతుంది. కానీ ఎప్పుడైతే మన వీరుడు వీరబాబు (సంగీత్ శోభన్) ఎంటర్ అయ్యాడో కథ స్వరూపం మారిపోతుంది. అప్పటివరకూ సోషియో ఫాంటసీ గా కనిపించిన కథ.. కామెడీ ట్రాక్లోకి వెళ్తుంది. ఎక్కడో అమెరికా నుంచి వచ్చిన వీరబాబుని తీసుకెళ్లి కోటలో పడేయడంతో కథ మలుపు తిరుగుతుంది. ఏదో చందమామ కథని చూస్తున్న ఫీల్ కలిగించి.. వీరబాబులోని ఫన్ ఎలిమెంట్స్ని పూర్తిగా వాడుకుంటూ.. కథని నడిపిన విధానం బావుంది. ఫాంటసీ, అడ్వెంచర్, కామెడీ జోనర్లను సమాంతరంగా జోడిస్తూ.. ఒక డిఫరెంట్ కాన్సెప్ట్ మూవీ చూశాం అనే ఫీల్ కలుగుతుంది. అయితే ఇలాంటి హారర్, సోషియో ఫాంటసీ కథలు వాస్తవానికి దూరంగా ఉంటాయి. చూసినంత వరకు ఎంజాయ్ చేయడానికి బాగానే ఉంటాయి. కానీ లాజిక్లు లాగితే మాత్రం అదీ నిజమే కదా అనిపిస్తుంది. ‘రాకాస’ కథ వెయ్యేళ్ల క్రితం నుంచి 2026 కి ట్రావెల్ అవుతుంది. ఈ రోజుల్లో కూడా ఈ రాక్షసుడు ఏంటి? కోట ఏంటి? బలి ఏంటి? మరి పోలీసులు, కేసులు, కోర్టులు ఏమీ లేవా? అని ఆలోచిస్తే మాత్రం ‘రాకాస’ని ఎంజాయ్ చేయలేరు. క్లైమాక్స్లో రాకాస గురించి ఏదో అద్భుతాన్ని ఊహించుకున్న నిరాశ తప్పదు. ‘రాకాస’లో వచ్చిన రియలైజేషన్ కూడా అతికించినట్టే ఉంటుంది. కోటలో అడుగుపెట్టడానికి భయపడిన వాళ్లు కోటలోకి ప్రవేశించాక.. అక్కడ జోక్లు వేసుకుంటూ సరదాగా ఉంటున్నా రాక్షసుడు ఏం చేయడా? అనే అనుమానాలు అనేకం వెంటాడతాయి. కానీ చివర్లో దెయ్యం లేదు గియ్యం లేదు అంటే అది రొటీన్ సినిమా అయిపోయేదే. కానీ ‘రాకాస’ అలాంటి రొటీన్ కాన్సెప్ట్లకు భిన్నంగానే అనిపిస్తుంది.
వినోదపు విందు:
ఫస్టాఫ్లో రాకాస నేపథ్యం ఒక ప్రత్యేక అనుభూతి కాగా.. ఆ తర్వాత నుంచి సంగీత్ శోభన్ అల్లరి మామూలుగా ఉండదు. వెన్నెల కిషోర్, గెటప్ శీనులతో కలిసి ఫన్ రైడ్ అందించారు. ముఖ్యంగా సంగీత్ శోభన్ సింగిల్ లైన్ పంచ్లు థియేటర్స్లో గలగల నవ్వేట్టు చేశాయి. వచ్చాడంటే పంచ్ వేసేస్తాడు అని మొహాలపై నవ్వుల్ని రెడీ చేసి పెట్టినట్టు చేశాడు. ఏదో నటిస్తున్నట్టు కాకుండా.. వీడు ఇలాగే ఉంటాడా అనేట్టుగా వీరబాబు పాత్రలో ఒదిగిపోయాడు. కోటలోకి వెళ్లడం.. దెయ్యాన్ని చూడ్డం.. ఆ దెయ్యాన్ని చూసి హీరో భయపడటం ఇదంతా చాలా రొటీన్ సెటప్. కానీ ఆ రొటీన్కి సోషియోఫాంటసీ విత్ ఫన్ జోడించి.. వినోదపు విందు అందించాడు సంగీత్ శోభన్.
హీరోయిన్ నయన్ సారిక బాగానే నటించింది. వెన్నెల కిషోర్ రోల్ సర్ ప్రైజింగ్గా అనిపిస్తుంది. గెటప్ శ్రీను కంటే కూడా వెన్నెల కిషోర్ ఎపిసోడ్ హైలైట్ అయ్యింది. వెన్నెల కిషోర్ పక్కన.. జబర్దస్త్ రోహిణి కామెడీ పండించింది. బ్రహ్మాజీ సింగిల్ లైన్ పంచ్లు పేలాయి. తనికెళ్ల భరణికి బ్రాహ్మణుడిగా ఆ పాత్రకి సరైన ప్రాధాన్యత కల్పించారు.
మ్యూజిక్..కెమెరా:
హారర్, సోషియో ఫాంటసీ బ్యాగ్రాప్ చిత్రాలకు బ్యాగ్రౌండ్ స్కోర్ చాలా కీలకం. చిన్న చిన్న సన్నివేశాలు కూడా థ్రిల్ చేసే విధంగా ఉండాలి. అటు హారర్, సోషియో ఫాంటసీ రెండింటిని బ్యాలెన్స్ చేస్తూ.. థ్రిల్ అయ్యేట్టు చేశారు అనుదీప్ దేవ్. ముఖ్యంగా కోటలోకి వెళ్లిన తరువాత తన వాయిద్యాలకు గట్టిగానే పనిచెప్పాడు అనుదీప్. సినిమాకి ఎక్కువ ఖర్చు పెడితే.. గ్రాండ్గా తక్కువ ఖర్చు పెడితే నాసిరకంగా చూపిస్తుంటుంది కెమెరా వర్క్. కానీ బడ్జెట్ తక్కువైనా కూడా ఆ లోపం విజువల్లో కనిపించకుండా చేయడం అనేది కొందరికే సాధ్యం అవుతుంది. కెమెరామెన్ రాజు ఎదురోలు ఈ విషయంలో తన పనితనం చూపించారు. వీఎఫ్ఎక్స్ విజువల్స్ అద్భుతం అనిపించకపోయినా కూడా.. నాసిరకం అనే ఫీల్ అయితే కలగకుండా జాగ్రత్తలు తీసుకున్నారు. నిర్మాణ విలువలతో మరోసారి ఆకట్టుకుంది ప్రొడ్యూసర్ నిహారిక.
నటులు: సంగీత్ శోభన్, నయన్ సారిక, వెన్నెల కిషోర్, గెటప్ శ్రీను, బ్రహ్మాజీ
దర్శకత్వం: మానస శర్మ