జీవితం అనేది సముద్రం లాంటిది. ఇక్కడన్నీ సిచ్యువేషన్స్ మాత్రమే ఉంటాయి.. ఇది రైట్ ఇది రాంగ్ అనేది ఉండదు. కాబట్టి ఎక్కువ ఆలోచించకుండా మూసుకుని ముందుకు వెళ్లిపోవడమే జీవితం.. ఆ జీవితాన్ని యూత్‌కి ఎలా చెప్తే అర్థం అవుతుందో.. ఎలా ఎక్కిస్తే ఇట్టే ఎక్కేస్తుందో చూపించే చిత్రం తాజాగా విడుదలైన ‘రోటి కపడా రొమాన్స్’.
కథ :
విక్కీ (సుప్రజ్ రంగా), హర్ష (హర్ష నర్రా), రాహుల్ (సందీప్ సరోజ్), సూర్య (తరుణ్ పొనుగోటి) నలుగురు స్నేహితులు. రాహుల్ సాఫ్ట్ వేర్.. సూర్య ఫేమస్ ఆర్జే.. హర్ష క్రియేటివ్ ఫీల్డ్.. వీక్కీ (టీటీపీ-తినడం తిరగడం పడుకోవడం). ఇలా వాళ్ల వాళ్ల పనుల్లో .. లైఫ్‌ని చిల్‌గా ఎంజాయ్ చేస్తుంటారు. వాళ్ల జీవితాల్లోకి సోనియా (ఖుష్బూ చౌదరి), శ్వేతా (మేఘా లేఖా), దివ్య (నువేక్ష), ప్రియా (సోనూ ఠాకూర్) వస్తారు. సోనియా-హర్ష, ప్రియ-రాహుల్, శ్వేత- విక్కీ, దివ్య- సూర్య.. ఈ ఎనిమిది మంది నాలుగు జంటలుగా మారి ప్రేమలో పడతారు. అయితే ఆ నలుగురు ఈ నలుగురి జీవితంలోకి వచ్చిన తరువాత అసలు సినిమా మొదలౌతుంది. అందరి ప్రేమకథల్లో ఉన్నట్టే.. కన్ఫ్యూజన్స్, మిస్ అండర్‌స్టాండింగ్స్, వన్ సైడ్ డిసిషన్స్ వల్ల ఈ నాలుగు జంటల ప్రేమకథలు అటకెక్కుతాయి. బ్రేకప్ చెప్పేసుకుంటారు. అలా విడిపోయిన ఈ నాలుగు జంటలు లైఫ్‌లో ఏవిధంగా రియలైజ్ అయ్యారనేదే ఈ సినిమా కథ.
ప్రేమ అనేది ఎవరి జీవితంలో ఉండదు? ప్రతి ఒక్కరి జీవితంలోనూ ఉండే ఉంటుంది. ఆ ప్రేమలో ఉన్న మధుర క్షణాలను గుర్తుపెట్టుకుని ముందుకు వెళ్లిపోయే వారు కొందరైతే.. ఆ ఊహల్లో నుంచి బయటకు రాలేక ఏడ్చేవాళ్లు మరికొందరు. ప్రేమ పేరుతో మోసం చేసిందని పగ, ప్రతీకారాలు పెంచుకునే వాళ్లు ఇంకొందరు. అయితే మన సమస్యను మన వైపు నుంచి చూస్తే పెద్దగా మరింత బాధగా అనిపిస్తుంటుంది. కానీ ఎందుకు అలా చేయాల్సివచ్చిందని అవతల వాళ్ల వైపు నిలబడి చేస్తేనే ఎవరి బాధ ఎంతో తెలిసేది. రియలైజేషన్ వచ్చేది. ‘రోటి కపడా రొమాన్స్’ చిత్రంలో అదే చూపించారు. ఒకర్నొకరు చూడ్డం.. ఇష్టపడటం.. ప్రేమించుకోవడం.. ఆ తరువాత మనస్పర్థలతో విడిపోవడం. అన్ని ప్రేమకథల్లో ఇవన్నీ రొటీన్. కానీ.. అడిగి చూడు అన్ని ప్రేమకథలు ఒకటిగా ఉండవు. చెప్పే విధానాన్ని బట్టే ఆ ప్రేమకథలో ఉన్న సోల్ ఏంటనేది తెలుస్తుంది. ‘రోటి కపడా రొమాన్స్’తో పాత కథనే కొత్త కోణంలో యూత్‌కి కనెక్ట్ చేశారు దర్శకుడు విక్రమ్ రెడ్డి.
స్క్రీన్ ప్లే మేజర్ హైలైట్ :
ముఖ్యంగా ఈ మూవీ స్క్రీన్ ప్లే మేజర్ హైలైట్. కథను ప్రారంభించిన తీరు.. ముందుకు తీసుకుని వెళ్లిన విధానంతో దర్శకుడు మంచి కథకుడే అనిపించారు. ఎక్కడా బోరింగ్ లేకుండా కథని ముందుకు తీసుకుని వెళ్లారు. నాలుగు ప్రేమకథలు అంటే.. కథలో కాస్త కన్ఫ్యూజన్ ఉండొచ్చు. కానీ.. ఎక్కడా అలాంటి కన్ఫ్యూజన్ లేకుండా ఫుల్ క్లారిటీ తో కథను నడిపించారు. దర్శకుడిగా బెస్ట్ కెరీర్‌ని ఊహించుకునే ఇండస్ట్రీకి వచ్చానని చెప్పిన దర్శకుడు విక్రమ్ రెడ్డి.. ‘రోటి కపడా రొమాన్స్’తో తొలి అడుగు గట్టిగానే పడింది. మంచి కథకుడు అనిపించాడు. ఈ సినిమా చూసి ఒక్కరైనా బాలేదంటే.. సినిమాలకు రిటైర్‌మెంట్ ఇచ్చేస్తానని స్టేట్‌మెంట్ ఇచ్చిన దర్శకుడికి ఆ అవసరం పడదు.
దర్శకత్వ ప్రతిభ :
నటులు ఎవరనేది ముఖ్యం కాదు.. తాను రాసుకున్న పాత్రలకు నటనతో జీవింపజేయగలరా లేదా అన్నదే దర్శకుడు దర్శకత్వ ప్రతిభ కి అద్దంపట్టేది. ఈ సినిమాలో హీరో ఎవరు? హీరోయిన్ ఎవరు అనేది కాకుండా.. తెరపై కనిపించిన పాత్రలే మనకు గుర్తొస్తాయి. సూర్య, విక్కీ, రాహుల్, హర్ష, సోనియా, ప్రియ, శ్వేతా, దివ్యా.. ఈ పాత్రలన్నీ కథతో పాటు జర్నీ చేసే పాత్రలే. ఆయా పాత్రల ఎంపిక తో దర్శకుడు మంచి మార్కులు కొట్టేశారు. ఆ పాత్రల్లో వాళ్లు ఇమిడిపోయారు. ప్రేమలో పడిన తరువాత.. పెళ్లి, పిల్లలు, బాధ్యత, ఫ్రీడమ్ వీటి చుట్టూనే మిస్ అండర్‌స్టాండింగ్స్ మొదలౌతుంటాయి. ఈ నాలుగు అంశాలను నాలుగు జంటలతో మిళితం చేసి.. వాటి నుంచి రియలైజేషన్ చూపించిన విధానం బాగుంది. యూత్‌కి ఇది ఒక సందేశంగానూ అనిపించొచ్చు. ‘రోటి కపడా రొమాన్స్’లో ఉన్న ఎమోషనల్ డెప్త్ యువత కనెక్ట్ అయిపోతుంది. నాది కూడా సేమ్ ప్రాబ్లం అని కనిపించే నాలుగు కథల్లో ఏదో ఒక కథకి కనెక్ట్ అయిపోతారు. కనిపించే ప్రతి పాత్రని ఓన్ చేసుకుంటారు. ఫస్టాఫ్‌లో రొమాన్స్ డోస్ కాస్త ఎక్కువే ఉంటుంది. అయితే అదేదో యూత్‌ని అట్రాక్ట్ చేయడానికే అన్నట్టుగా కాకుండా.. కథకి కావాల్సిందే అనేట్లుగా చూపించారు. ఆ రొమాన్స్ కథకి అవసరం మరి. కానీ ఫ్యామిలీతో కలిసి చూసేవాళ్లకు కాస్త ఇబ్బందిగా అనిపిస్తాయి.
అన్నీ సమపాళ్లలో :
సినిమా బాగుందని అనిపించుకోవాలంటే అన్నీ సమపాళ్లలో కుదరాలి. ఈ సినిమాకి నటీనటుల ఎంపిక, కథ, కథనం డైరెక్షన్‌తో పాటు.. కథలోని మూడ్‌ను క్యారీ చేయడంలో సంగీతం, సినిమాటోగ్రఫీ బాగా హెల్ప్ అయ్యాయి. ముఖ్యంగా పాటలు అయితే.. ఏదో రన్ టైమ్ కోసం.. అన్నట్టుగా కాకుండా.. కథలో భాగంగానే వస్తుంటాయి. పాటల్లో కూడా కథ కంటిన్యూ అవుతుండటం రేర్‌గా చూస్తుంటాం. ‘రోటి కపడా రొమాన్స్’లో అలాంటి రేర్ ఫీట్ కనిపించింది. లవ్, ఎమోషన్స్, రొమాన్స్ ఇలా ఏ సీన్ చూసుకున్నా బ్యాగ్రౌండ్ మ్యూజిక్‌తో బాగా ఎలివేట్ చేశారు. సన్నీ ఎంఆర్, హర్షవర్ధన్ రామేశ్వర్, ఆర్ఆర్ ధృవన్ త్రయానికి మ్యూజిక్ పరంగా మంచి మార్కులు పడతాయి. సంతోష్ రెడ్డి సినిమాటోగ్రఫీ బాగుంది.
నటులు:
హర్ష నర్రా, సందీప్ సరోజ్, తరుణ్, సుప్రజ్ రంగా, సోనూ ఠాకూర్, నువ్వేక్ష, మేఘలేఖ, ఖుష్బూ చౌదరి
దర్శకుడు: విక్రమ్ రెడ్డి