ప్రస్తుత ఉరుకుల పరుగుల జీవితంలో ఎక్కువ శాతం మంది ఓ పక్కా ప్రణాళిక లేకుండా బతికేస్తున్నారు. సరైన టైం లో తినకపోవడం, జంక్ ఫుడ్ తినడం, స్మోకింగ్, డ్రింకింగ్ ఇలా ఓ పద్ధతి లేకుండా జీవిస్తున్నారు. దీంతో.. చాలా ఆరోగ్య సమస్యలు తప్పడం లేదు. అందులో ముఖ్యంగా ప్రపంచం మొత్తాన్ని భయపెడుతున్నది గుండెపోటు సమస్య. ఈ రోజుల్లో యువత కూడా గుండె పోటు బారిన పడుతున్నారు. ఇది అకస్మాత్తుగా సంభవించవచ్చు. చాలా సందర్భాల్లో ప్రాణాంతకంగా మారుతుంది. గుండెపోటు యొక్క కొన్ని లక్షణాలు స్పష్టంగా కనిపిస్తాయి. మరికొన్నింటిని గుర్తించకపోవచ్చు. గుండెపోటు సంకేతాలు లేదా లక్షణాలు తెలుసుకోవడం ద్వారా ముందే అప్రమత్తం కావచ్చని నిపుణులు చెబుతున్నారు.
*గుండెపోటు అత్యంత సాధారణ లక్షణం ఛాతీ నొప్పి లేదా అసౌకర్యం. ఇది తరచుగా ఒత్తిడి, బిగుతు, భారంగా లేదా మండుతున్నట్టుగా అనిపిస్తుంది. ఈ నొప్పి సాధారణంగా ఛాతీ మధ్యలో సంభవిస్తుంది. కొన్ని నిమిషాల కంటే ఎక్కువ కాలం ఉంటుంది. కొన్నిసార్లు ఈ నొప్పి మెడ, ఎడమ దవడ, భుజం, వీపు లేదా చేతులకు వ్యాపిస్తుంది. అయితే, ఛాతీ నొప్పి కొన్నిసార్లు గ్యాస్ వల్ల కూడా రావచ్చు.
*గుండెపోటు సమయంలో, గుండె పనిచేసే సామర్థ్యం తగ్గుతుంది. దీని కారణంగా తగినంత రక్తం మెదడుకు చేరదు. దీంతో రక్తపోటు తగ్గడం ప్రారంభమవుతుంది. దీనివల్ల తల తిరగడం, కళ్లు బైర్లు కమ్మడం, మూర్ఛ పోవడం వంటి లక్షణాలు కనిపించవచ్చు. మీకు అకస్మాత్తుగా తల తిరుగుతున్నట్లు అనిపిస్తే, అది గుండె సంబంధిత సమస్యకు సంకేతం కావచ్చు.
*ఛాతీ నొప్పితో లేదా ఛాతీ నొప్పి లేకపోయినా శ్వాస ఆడకపోవడం గుండెపోటుకు కీలకమైన సంకేతం. గుండె సరిగ్గా పనిచేయలేనప్పుడు, ఊపిరితిత్తులు సరైన మొత్తంలో ఆక్సిజన్ను అందుకోలేనప్పుడు ఈ సమస్య వస్తుంది. ఉన్నట్టుండి శ్వాస తీసుకోవడంలో ఇబ్బంది పడుతుంటే, అది గుండెపోటుకు సంకేతం కావచ్చు.
*అకస్మాత్తుగా చలితో చెమటలు పట్టడం గుండెపోటుకు మరొక హెచ్చరిక లక్షణం. ఈ చెమట సాధారణంగా ఒత్తిడి లేదా వేడి వల్ల కలగదు. కానీ శరీరం లోపల జరుగుతున్న కొంత అవాంతరానికి సంకేతం కావచ్చు. ఎటువంటి కారణం లేకుండా మీకు చెమటలు పడుతుంటే, దాన్ని లైట్ తీసుకోవద్దు.
*ఎటువంటి కష్టం, పని చేయకపోయినా చాలా అలసిపోయినట్లు అనిపిస్తే, అది గుండెపోటుకు సంకేతం కావచ్చు. ఈ అలసట సాధారణంగా కొన్ని రోజులు లేదా వారాల ముందుగానే ప్రారంభమవుతుంది. రోజు రోజుకి అలసట క్రమంగా పెరుగుతుంది. ఈ లక్షణం మహిళల్లో ఎక్కువగా కనిపిస్తుంది.
*కొంతమందికి గుండెపోటు సమయంలో వికారం, వాంతులు లేదా కడుపు నొప్పి వంటి సమస్యలు కనిపిస్తాయి. ఈ లక్షణం తరచుగా మహిళల్లో ఎక్కువగా కనిపిస్తుంది. మీకు ఎటువంటి అనారోగ్యం లేకుండానే వికారం లేదా వాంతులు అనిపిస్తే, దాన్ని తీవ్రంగా పరిగణించండి. అంతేకాకుండా చాలా మందికి గుండెపోటుకు ముందు అజీర్ణం లేదా ఛాతీలో మంట గా అనిపించవచ్చు.
*గుండెపోటు సమయంలో, నొప్పి ఛాతీ నుంచి ప్రారంభమై చేతులు, మెడ, దవడ లేదా వీపు వరకు వ్యాపిస్తుంది. ఈ నొప్పి సాధారణంగా ఎడమ చేతిలో ఎక్కువగా ఉంటుంది. కానీ కుడి చేతిలో కూడా సంభవించవచ్చు. ఈ ప్రాంతాల్లో అకస్మాత్తుగా నొప్పి వస్తే, అది గుండెపోటుకు సంకేతం కూడా కావచ్చు.
*హృదయ స్పందనలో హెచ్చుతగ్గులుగా అనిపిస్తే, అది గుండెపోటుకు సంకేతం కావచ్చు. దీనిని తరచుగా “దడ” అని పిలుస్తారు. ఈ సమయంలో గుండె వేగంగా కొట్టుకుంటుంది లేదా కొట్టుకుంటున్నట్లు అనిపిస్తుంది. ఈ లక్షణం తీవ్రంగా ఉంటుంది. ఈ లక్షణాలు కనిపిస్తే వెంటనే వైద్యుడిని సంప్రదించాలి.