మంచి యాంటీ ఆక్సిడెంట్ గా బాదం గుర్తింపు పొందింది. ఇందులో అనేక రకాల పోషకాలు పుష్కలంగా ఉంటాయి. ఇవి శరీరానికి అనేక వ్యాధుల నుంచి ఉపశమనం కలిగించడంలో తోడ్పడతాయి. అందుకే బాదం పప్పు ఆరోగ్యానికి చాలా మంచిదని నిపుణులు చెబుతున్నారు. బాదం లో ఫైబర్, మెగ్నీషియం, కాల్షియం, విటమిన్-ఇ వంటి పోషకాలు పుష్కలంగా ఉంటాయి. ఇవి పొట్ట ఆరోగ్యానికి, ఎముకలకు, జుట్టుకు ఉపయోగపడతాయని చెబుతారు. అయితే, బాదం అందరికీ సరిపోదు. కొన్ని రకాల ఆరోగ్య సమస్యలు ఉన్నవారు బాదం తినకపోవడం మంచిదని, ఎవరు బాదం తినకూడదో నిపుణులు హెచ్చరిస్తున్నారు.
ఆరోగ్యపరంగా బాదం మేలు చేస్తుంది. ఇందులో ఫైబర్ అధికంగా ఉంటుంది. ఇది మెరుగైన జీర్ణక్రియను నిర్వహించడంలో చాలా సహాయకారిగా ఉంటుంది. బాదం పప్పులు మలబద్దకం నుండి ఉపశమనం కలిగిస్తాయి. పేగులను శుభ్రంగా ఉంచుతాయి. ప్రతిరోజూ రాత్రి పడుకునే ముందు 5 నుండి 7 బాదంపప్పులు శుభ్రమైన నీటిలో నానబెట్టి, మరుసటి రోజు ఉదయం ఖాళీ కడుపుతో బాదం పప్పు తినడం వల్ల చాలా ప్రయోజనాలు లభిస్తాయి. కానీ వాటిని త్వరగా మింగేయకుండా బాగా నమిలి తినాలని నిపుణులు చెబుతున్నారు. బాదం పప్పులో ఉండే ఆరోగ్యకరమైన కొవ్వులు గుండె ఆరోగ్యానికి మేలు చేస్తాయి. రోజూ బాదం తినడం వల్ల చెడు కొలెస్ట్రాల్ తగ్గుతుంది. గుండె జబ్బుల ప్రమాదాన్ని తగ్గిస్తుంది. బాదంలోని ఆరోగ్యకరమైన కొవ్వులు, ప్రోటీన్, ఫైబర్.. శరీరానికి అవసరమైన శక్తిని అందిస్తాయి. బాదంలో ప్రత్యేకంగా రైబోఫ్లేవిన్, ఎల్-కార్నిటైన్ అనే పోషకాలు మెదడు పనితీరును మెరుగు పరుస్తాయి. మెదడు నిత్యం చురుగ్గా ఉండేలా సాయం చేస్తాయి.
నిపుణులు చెబుతున్న దాని ప్రకారం, మూత్రపిండాల్లో రాళ్లు ఉన్నవారు, జీర్ణ సమస్యలు ఉన్నవారు, అధిక రక్తపోటుకు మందులు వాడుతున్నవారు బాదం తినేటప్పుడు జాగ్రత్తగా ఉండాలి. ఎక్కువగా తినడం వల్ల ఆరోగ్యానికి హాని కలగవచ్చు. చాలామందికి బాదం శరీరానికి వేడి ఇవ్వడంలో, రోగనిరోధక శక్తిని పెంచడంలో ఉపయోగపడుతుంది. కానీ, బాదం తిన్న తర్వాత కడుపు నొప్పి, గ్యాస్ లేదా మొటిమలు వస్తే వెంటనే జాగ్రత్త పడాలి. కిడ్నీ సమస్యలు ఉన్నవారు బాదం తినకూడదని ఆరోగ్య నిపుణులు చెబుతున్నారు. ఎందుకంటే బాదంలో ఫాస్ఫరస్, ఆక్సలేట్ ఎక్కువగా ఉంటాయి. ఇవి ఎక్కువగా తీసుకుంటే మూత్రపిండాల్లో రాళ్లు ఏర్పడే అవకాశం ఉంటుంది. కొన్ని యాంటీబయాటిక్ మందులు వాడుతున్నవారు వైద్యుల సలహా మేరకు మాత్రమే బాదం తీసుకోవాలి.