చాలా మంది భోజనం చేసిన తర్వాత పడుకోవడం, కూర్చుని రిలాక్స్‌ అవ్వడమో చేస్తూ ఉంటారు. ముఖ్యంగా రాత్రిపూట తిన్న తర్వాత వెంటనే బెడ్‌ మీద వాలిపోతూ ఉంటారు. ఈ అలవాటు అనేక ఆరోగ్య సమస్యలను ఆహ్వానిస్తుందని నిపుణులు హెచ్చరిస్తున్నారు. తిన్న తర్వాత కొంతసేపు నడవాలని నిపుణులు సూచిస్తున్నారు. దీని వల్ల అనేక ఆరోగ్య ప్రయోజనాలను ఉన్నాయని అంటున్నారు.*భోజనం చేసిన తర్వాత కొంత సమయం నడిస్తే.. జీర్ణక్రియ మెరుగుపడుతుంది. శరీర కదలికలు కడుపు, పేగలను యాక్టివ్‌ చేసి జీర్ణక్రియకు సహాయపడతాయి, దీని వల్ల ఆహారం మరింత వేగంగా కదులుతుంది. తిన్న తర్వాత తక్కువ నుంచి మితమైన శారీరక శ్రమ జీర్ణశయాంతర ట్రాక్ట్‌ను రక్షిస్తుందని అధ్యయనాలు స్పష్టం చేస్తున్నాయి. తిన్న తర్వాత నడిస్తే.. పెప్టిక్ అల్సర్లు, గుండెల్లో మంట, ప్రకోప ప్రేగు సిండ్రోమ్ (ఐబీఎస్), డైవర్టిక్యులర్ డిసీజ్, మలబద్ధకం, కొలొరెక్టల్ క్యాన్సర్ వంటి వ్యాధులను నివారిస్తుంది.*తిన్న తర్వాత కొంత సమయం నడిస్తే రక్తంలో చక్కెర స్థాయిలు కంట్రోల్‌లో ఉంటాయని నిపుణులు చెబుతున్నారు. టైప్‌ 1, టైప్‌ 2 డయాబెటిస్‌ ఉన్న వ్యక్తులు ఇది చాలా మేలు చేస్తుంది. తిన్న తర్వాత.. స్వల్ప శారీరక శ్రమ చేయడం వల్ల బ్లడ్‌ షుగర్‌ స్పైక్‌‌లను నిరోధించవచ్చు. తద్వారా ఇన్సులిన్‌, ఓరల్‌ మెడిసిన్‌ మొత్తాన్ని తగ్గించవచ్చని నిపుణులు అంటున్నారు. టైప్‌ 2 డయాబెటిక్‌ పేషెంట్స్‌ తిన్న తర్వాత 10 నిమిషాలు నడిస్తే.. రక్తంలో చక్కెర స్థాయిలు కంట్రోల్‌లో ఉంటాయని 2016లో నిర్వహించిన అధ్యయనం స్పష్టం చేసింది.*క్రమం తప్పకుండా వ్యాయమం చేస్తే.. హైపర్‌టెన్షన్‌, చెడు కొలెస్ట్రాల్‌ కంట్రోల్‌లో ఉంటుందని మనకు తెలుసు. దీనితో పాటు స్ట్రోక్‌, గుండెపోటు ముప్పును కూడా తగ్గిస్తుంది. గుండె జబ్బులకు ప్రమాద కారకంగా ఉండే ట్రైగ్లిజరైడ్‌లను తగ్గించడానికి రోజంతా అనేక చిన్నపాటి వ్యాయామాలు చేయడం మంచిదని ఒక అధ్యయనం స్పష్టం చేసింది. వారానికి కనీసం 5 రోజులు 30 నిమిషాలు వ్యాయామం చేస్తే గుండెకు మంచిదని చెబుతున్నారు. భోజనం తర్వాత రోజుకు మూడు 10 నిమిషాలు నడిస్తే.. ఈ టార్గెట్‌ పూర్తి అవుతుంది.*భోజనం తర్వాత కొంతసమయం నడిస్తే.. బరువు కంట్రోల్‌లో ఉంటుందని నిపుణులు చెబుతున్నారు. దీని వల్ల క్యాలరీలు కరుగుతాయి, ఆహారం కొవ్వుగా మారదు.*తిన్న తర్వాత నడక వల్ల శరీరంలో ఎండార్ఫిన్‌లు విడుదలవుతాయి. ఇది మానసిక స్థితిని మెరుగుపరుస్తుంది. ఒత్తిడి తగ్గుతుంది. రిలాక్స్‌గా ఫీల్ అవుతారు. నిద్రలేమి సమస్యను దూరం చేస్తుంది.*భోజనం చేసిన తర్వాత పది నిమిషాల పాటు నడిస్తే సరిపోతుందని నిపుణులు అంటున్నారు. మొదటి 10 నిమిషాలతో ప్రారంభించి ఆపై సమయాన్ని పెంచుకుంటూ రావచ్చని చెబుతున్నారు.