డా. కృష్ణ నడింపల్లి ఆత్మకథ “శిఖరం చేరిన కెరటం” పుస్తకావిష్కరణ సభ – మెల్బోర్న్‌లో స్ఫూర్తిదాయక సాహిత్య వేడుక
ఆత్మకథలు వ్యక్తిగత జీవిత విశేషాల సమాహారం మాత్రమే కాదు; అవి కాలానుభవానికి అద్దం పట్టే చారిత్రక పత్రాలు కూడా. జీవితంలో ఆరాటాలు, పోరాటాలు, విజయాలు, అనుభూతులు, అనుభవాలు, విలువలను భావితరాలకు అందించే సాధనాలుగా నిలుస్తాయి. అలాంటి విశిష్ట ఆత్మకథల సరసన చేరిన డా. కృష్ణ నడింపల్లి గారి “శిఖరం చేరిన కెరటం” పుస్తకావిష్కరణ కార్యక్రమం 25 అక్టోబరు 2026న ఆస్ట్రేలియాలోని మెల్బోర్న్ నగరంలో ఘనంగా జరిగింది.
తెలుగు సాహిత్యాభిమానులు, ప్రవాసాంధ్రులు, సాంస్కృతిక సంస్థల ప్రతినిధులు, ప్రముఖ రచయితలు, విద్యావేత్తలు హాజరైన ఈ కార్యక్రమం సాహిత్యసౌరభాలతో కళకళలాడింది. డా. కృష్ణ నడింపల్లి గారి జీవన ప్రస్థానాన్ని ప్రతిబింబించే ఈ ఆత్మకథ, సాధారణ పరిస్థితుల నుంచి అసాధారణ విజయశిఖరాలను అధిరోహించిన వ్యక్తిత్వానికి అక్షరరూపమని పలువురు వక్తలు అభిప్రాయపడ్డారు.
“శిఖరం చేరిన కెరటం” అనే శీర్షికే రచయిత జీవనస్ఫూర్తిని ప్రతిబింబిస్తుందని సభలో ప్రసంగించిన వారు పేర్కొన్నారు. కెరటం సముద్ర అలలా నిరంతరం ముందుకు సాగుతూ, అనేక ఆటుపోట్లను ఎదుర్కొని చివరకు శిఖరాన్ని చేరిన వ్యక్తి కథగా ఈ పుస్తకం నిలుస్తుందని వారు విశ్లేషించారు. బాల్యం నుంచి విద్య, వృత్తి, సామాజిక సేవ, సాహిత్యాభిరుచి వరకు విస్తరించిన రచయిత జీవితంలోని అనేక కోణాలను ఈ గ్రంథం ఆవిష్కరిస్తుందని అభినందించారు.
ముందుగా ఆశ్రిత మరియు నైశిత ప్రార్ధనా గీతం పాడగా పుస్తకావిష్కరణ సభ మొదలైంది.
శ్రీ రావు కొంచాడ గారు పుస్తక పరిచయం చేస్తూ శ్రీ కృష్ణ నడింపల్లిగారి జీవితంలోని కొన్ని ముఖ్య సంఘటనలు ప్రస్తావించారు. రచయిత శ్రీ పగిడిపాల ఆంజనేయులు గారు రెండేళ్లుగా చేసిన కృషిని కొనియాడారు.
అడిలైడ్ నుండి సౌత్ ఆస్ట్రేలియా తెలుగు సంఘం అధ్యక్షులు శ్రీ సత్యనారాయణ శీలం గారు, మెల్బోర్న్ తెలంగాణా ఫోరం వ్యవస్థాపక అధ్యక్షులు శ్రీ వెంకటేశ్వర రెడ్డి నూకల (వెంకన్న) మరియు శ్రీ కనుమూరి సీతారామరాజు గార్లు ఆత్మీయ అతిథులుగా ప్రసంగించారు.
సభలో వక్తలు మాట్లాడుతూ, వ్యక్తిగత విజయాలను మాత్రమే కాకుండా సమాజంతో మమేకమైన జీవనయాత్రను కూడా ఈ ఆత్మకథలో రచయిత ఆవిష్కరించారని పేర్కొన్నారు. నేటి యువతకు, ప్రవాస భారతీయులకు ఈ గ్రంథం మార్గదర్శకంగా నిలుస్తుందని అభిప్రాయపడ్డారు. విజయానికి కృషి, క్రమశిక్షణ, సంకల్పబలం ఎంత అవసరమో ఈ పుస్తకం స్పష్టంగా తెలియజేస్తుందని అన్నారు.
పుస్తకావిష్కరణ అనంతరం డా. కృష్ణ నడింపల్లి గారు మాట్లాడారు. తన జీవితంలో ఎదురైన అనుభవాలు, సవాళ్లు, విజయాలు పాఠకులకు ప్రేరణగా నిలవాలనే ఉద్దేశంతోనే ఈ ఆత్మకథ రాసినట్లు తెలిపారు. దాతృత్వం తన జీవితంలో భాగమని, అడిగిన వారికి ఏదో రూపంలో సహాయం అందివ్వడమే తన బాధ్యతని కాదని, లేదని చెప్పడం తనకు చేతకాదని తెలిపారు. జీవినపయనంలో అందించిన సహకారాన్ని స్మరించుకుంటూ కుటుంబ సభ్యులు, మిత్రులు, గురువులు, సహచరులకు కృతజ్ఞతలు తెలియజేశారు.
మెల్బోర్న్ నగరంలో జరిగిన ఈ పుస్తకావిష్కరణ సభ ప్రవాస తెలుగు సమాజంలో సాహిత్య చైతన్యాన్ని ప్రతిబింబించింది. తెలుగు భాషా సంస్కృతుల పట్ల ప్రవాసాంధ్రుల అనుబంధాన్ని మరోసారి చాటిచెప్పింది. డా. కృష్ణ నడింపల్లి గారి “శిఖరం చేరిన కెరటం” కేవలం ఒక వ్యక్తి ఆత్మకథ మాత్రమే కాకుండా, పట్టుదలతో కలలు సాకారం చేసుకున్న జీవితానికి ప్రతీకగా, భావితరాలకు స్ఫూర్తినిచ్చే గ్రంథంగా నిలుస్తుందని సభలో పాల్గొన్నవారు ఆకాంక్షించారు.
