జంక్ ఫుడ్ వల్ల శారీరక ఆరోగ్యం దెబ్బతింటుందని, అధిక బరువు, ఊబకాయం వంటి సమస్యలు తప్పవని వైద్యులు హెచ్చరిస్తుంటారు. అయితే ఈ జంక్ ఫుడ్ వల్ల మెదడుకు ముప్పుతప్పదని తాజా అధ్యయనం తేటతెల్లం చేస్తోంది. పిల్లలు చాక్లెట్లు, బర్గర్లు, పిజ్జాలు, చిప్స్ వంటి జంక్ ఫుడ్ను అమితంగా ఇష్టపడుతుంటారు. అయితే, చిన్నతనంలో అధికంగా తినే ఈ జంక్ ఫుడ్ వల్ల వారి మెదడులో శాశ్వత మార్పులు వచ్చే ప్రమాదం ఉందని ఒక అంతర్జాతీయ పరిశోధనలో తేలింది. ఈ ప్రభావం ఎంత తీవ్రంగా ఉంటుందంటే.. ఆ తర్వాత కాలంలో వారు ఆరోగ్యకరమైన ఆహార అలవాట్లను అలవర్చుకున్నా, బరువు తగ్గినా కూడా మెదడుపై పడిన ఆ ముద్రలు అలాగే ఉండిపోతాయని శాస్త్రవేత్తలు హెచ్చరిస్తున్నారు. యూనివర్సిటీ కాలేజ్ కార్క్ కి చెందిన ఏపీసీ మైక్రోబయోమ్ పరిశోధకులు చేసిన ఈ సరికొత్త అధ్యయనం ప్రకారం, కొవ్వు, చక్కెర అధికంగా ఉండే ఆహారాలు పిల్లల ఆకలిని నియంత్రించే మెదడు భాగాలపై నేరుగా ప్రభావం చూపుతాయి.
నేటి కాలంలో పిల్లల పుట్టినరోజు వేడుకలు, స్కూల్ ఈవెంట్స్, స్పోర్ట్స్ యాక్టివిటీస్ వంటి ప్రతి సందర్భంలోనూ ప్రాసెస్ చేసిన జంక్ ఫుడ్స్, చక్కెర పానీయాలు సర్వసాధారణంగా మారిపోయాయి. నిరంతరం ఇలాంటి ఆహారాలకే అలవాటు పడటం వల్ల చిన్న వయసులోనే వారి ఆహార ప్రాధాన్యతలు మారిపోతాయి. “నేచర్స్ కమ్యూనికేషన్స్” పత్రికలో ప్రచురితమైన ఈ నివేదిక ప్రకారం.. చిన్నతనంలో ఎక్కువ కేలరీలు, తక్కువ పోషకాలు ఉన్న ఆహారాన్ని తీసుకోవడం వల్ల అది యుక్త వయస్సు వచ్చాక కూడా వారి తినే ప్రవర్తనను శాసించేలా మారుతుంది. ఎలుకలపై చేసిన ప్రిక్లినికల్ ప్రయోగాలలో.. చిన్న వయసులో జంక్ ఫుడ్ తిన్న జంతువుల మెదడులోని ‘హైపోథాలమస్’ (ఆకలి, శక్తి సమతుల్యతను నియంత్రించే భాగం) దెబ్బతిన్నట్లు పరిశోధకులు గుర్తించారు. దీనివల్ల వారు పెద్దయ్యాక కూడా విపరీతంగా తినే అలవాటు నుండి బయటపడలేరని, ఇది భవిష్యత్తులో స్థూలకాయం ప్రమాదాన్ని భారీగా పెంచుతుందని తేలింది.
మెదడుపై పడే ఈ హానికరమైన ప్రభావాలను పాక్షికంగానైనా తగ్గించడానికి ఒక సరికొత్త మార్గాన్ని కూడా శాస్త్రవేత్తల బృందం కనుగొంది. మన పొట్టలోని గట్ మైక్రోబయోమ్ లేదా గట్ బ్యాక్టీరియాను లక్ష్యంగా చేసుకోవడం ద్వారా ఈ నష్టాన్ని కొంతవరకు నివారించవచ్చని వారు గుర్తించారు. ఇందుకోసం ‘బైఫిడోబాక్టీరియం లాంగమ్ ఏపీసీ 1472’ అనే ప్రోబయోటిక్ బ్యాక్టీరియా స్ట్రెయిన్తో పాటు ‘ప్రీబయోటిక్ ఫైబర్లను’ పరీక్షించారు. ఈ ప్రత్యేక ఫైబర్లు ఉల్లిపాయలు, వెల్లుల్లి, లీక్స్, ఆస్పరాగస్ మరియు అరటిపండ్లలో సహజంగా లభిస్తాయి. జీవితాంతం ఈ ప్రోబయోటిక్ మరియు ప్రీబయోటిక్ ఫైబర్ల మిశ్రమాన్ని ఆహారంలో అందించడం వల్ల, అవి పొట్టలోని బ్యాక్టీరియాను మార్చి మళ్లీ ఆరోగ్యకరమైన ఆహారపు అలవాట్లను పునరుద్ధరించగలవని ఈ ప్రయోగంలో వెల్లడైంది. అందుకే, పిల్లల డైట్ విషయంలో తల్లిదండ్రులు చిన్నప్పటి నుంచే తగిన జాగ్రత్తలు తీసుకోవడం ఎంతో అవసరమని ఈ పరిశోధన హెచ్చరిస్తోంది.