విజయ్ దేవరకొండ, గౌతమ్ తిన్ననూరి కాంబోలో రూపొందుతున్న సినిమా టైటిల్‌ను ఎట్టకేలకు ప్రకటించారు. ఈ సినిమాకు ‘కింగ్‌డమ్’ అని టైటిల్ ఖరారు చేశారు. టీజర్‌ను రిలీజ్ చేసిన మేకర్స్ సినిమా విడుదల తేదీపై క్లారిటీ ఇచ్చారు. సినిమా అప్‌డేట్‌ ఇస్తే అంచనాలు అమాంతం పెరుగుతాయని మేకర్స్ భావించారు. అందుకు తగ్గట్లుగా టీజర్‌కి ఎన్టీఆర్, రణబీర్‌ కపూర్‌, సూర్యలతో వాయిస్ ఓవర్‌ చెప్పించారు.
తెలుగు వెర్షన్ టీజర్‌కి ఎన్టీఆర్ వాయిస్ ఓవర్‌ చెప్పగా, హిందీ వెర్షన్ టీజర్‌కి రణబీర్‌ కపూర్‌ వాయిస్ ఇచ్చారు. ఇక తమిళ వెర్షన్‌‌కి సూర్య వాయిస్ ఓవర్‌ ఇచ్చారు. ఎన్టీఆర్ వాయిస్ ఓవర్‌తో టీజర్ అంటూ ప్రకటించినప్పటి నుంచి అంచనాలు మరింతగా పెరిగాయి. ఇప్పటి వరకు గౌతమ్ తిన్ననూరి నుంచి వచ్చిన సినిమా తరహాలో కాకుండా మరో లెవల్‌లో ఈ సినిమా ఉంటుందని మొదటి నుంచి నిర్మాత నాగవంశీ చెబుతూ వస్తున్నారు. ఆయన అన్నట్లుగానే సినిమ మరో లెవల్‌లో ఉండబోతుంది అనిపిస్తుంది. టీజర్‌లో ఎన్టీఆర్ వాయిస్ ఓవర్‌తో విజువల్స్‌ను చూస్తూ ఉంటే ఒక కేజీఎఫ్‌, ఒక సలార్‌ రేంజ్ యాక్షన్ వరల్డ్‌ మూవీస్‌ను చూస్తున్న ఫీల్‌ కలిగింది. అనిరుద్ బ్యాక్‌ గ్రౌండ్‌ మ్యూజిక్‌ టీజర్‌ను మరో రేంజ్‌కి తీసుకు వెళ్లింది. సినిమాకి పవర్‌ ఫుల్‌ టైటిల్ ‘కింగ్‌డమ్’ని ఖరారు చేశారు.
టీజర్‌లో ఎన్టీఆర్… “అలసట లేని భీకర యుద్ధం, అలలుగా పారే ఏరుల రక్తం… వలస పోయినా, అలిసి పోయినా ఆగిపోనిది ఈ మహారణం… నేలపైన దండయాత్రలు, మట్టి కింద మృతదేహాలు…. ఈ అలజడి ఎవరి కోసం, ఇంత బీభత్సం ఎవరి కోసం… అసలు ఈ వినాశనం ఎవరి కోసం.. రణ భూమిని చీల్చుకుని పుట్టే కొత్త రాజు కోసం, కాల చక్రాన్ని బద్దలు కొట్టి పునర్జన్మనెత్తిన నాయకుడి కోసం అంటూ చెప్పిన డైలాగ్స్‌ సినిమాకి విపరీతమైన ఎలివేషన్ ఇచ్చే విధంగా ఉన్నాయి. ఎన్టీఆర్ డైలాగ్స్‌కి ఏమాత్రం తగ్గకుండా గౌతమ్ తిన్ననూరి అద్భుతమైన విజువల్స్‌ను క్రియేట్‌ చేశారు. చివర్లో విజయ్ దేవరకొండ.. ఏమైనా చేస్తా సర్‌, అవసరమైతే మొత్తం తగలబెట్టేస్తా సర్‌ అని చెప్పిన డైలాగ్‌ సినిమాపై మరింత ఆసక్తిని రేకెత్తిస్తుంది.
ఇన్ని రోజులు గౌతమ్ తిన్ననూరి దర్శకత్వంలో విజయ్ దేవరకొండ సినిమా అంటే ఒక ఫీల్‌ గుడ్ మూవీ అనుకున్న ఫ్యాన్స్‌, ప్రేక్షకులు ఈ టీజర్ చూసిన తర్వాత కచ్చితంగా సర్‌ప్రైజ్‌ అవుతారు. పాన్ ఇండియా రేంజ్ కంటెంట్‌ అని టీజర్‌తోనే తేల్చేసిన దర్శకుడు గౌతమ్ తిన్ననూరి సినిమాలో ఇంకా ఎలాంటి వండర్స్‌ను చూపించబోతున్నాడో అనే ఆసక్తి రౌడీ ఫ్యాన్స్‌లో వ్యక్తం అవుతోంది. విజయ్ దేవరకొండ ఈ సినిమా కోసం గత ఏడాది కాలంగా కష్టపడుతున్నారు. మరే సినిమాకు కమిట్‌ కాకుండా పూర్తిగా ఈ సినిమాకే సమయం కేటాయించారు. రౌడీ స్టార్‌ను విభిన్నమైన గెటప్‌లో చూపించడం మాత్రమే కాకుండా ఓ పవర్‌ హౌస్‌గా గౌతమ్ తిన్ననూరి చూపించబోతున్నారు. కింగ్‌డమ్ అనే టైటిల్‌ను పెట్టడంతో సినిమాపై మరింతగా ఆసక్తి పెరుగుతోంది. టీజర్‌తో కథ ఏంటి అనే విషయంలో క్లారిటీ రాలేదు, కానీ కంటెంట్‌ ఎలా ఉండబోతుంది అనే విషయమై గౌతమ్ తిన్ననూరి క్లారిటీ ఇచ్చారు.