యువహీరో సందీప్ కిషన్ మంచి యాక్టర్ అయినా కూడా తన స్థాయికి తగ్గ విజయం మాత్రం దక్కడం లేదు. మంచి కాన్సెప్ట్‌లను ఎంచుకుంటాడు. కానీ వాటి ఫలితం మాత్రం అంతంగానే ఉంటోంది. ఇక తాజాగా ఊరు పేరు భైరవకోన అంటూ అందరినీ ఆకట్టుకునేందుకు వచ్చాడు. అసలే ఈ చిత్రం టీజర్, ట్రైలర్ అందరినీ బాగానే ఆకట్టుకున్నాయి.
కథ
బసవ (సందీప్ కిషన్) కాత్యాయని (సత్య) పెళ్లి జరుగుతుండగా.. అరవై లక్షల విలువైన బంగారు నగల్ని దొంగిలిస్తాడు. ఈ క్రమంలో పోలీసులు బసవ వెంటపడుతంటారు. బసవతో పాటు జాన్ (హర్ష) కూడా ఈ దొంగతనంలో పాలుపంచుకుంటాడు. ఈ ఇద్దరూ తప్పించుకుంటున్న క్రమంలో గీత (కావ్యా థాపర్) వీరి వద్ద ఉన్న నగల్ని దొంగిలించేందుకు ప్లాన్ చేస్తుంది. యాక్సిడెంట్ అయినట్టుగా నాటకం ఆడుతుంది. అది తెలియని బసవ ఆమెను హాస్పిటల్‌లో జాయిన్ చేయాలని సాయం చేస్తాడు. ఈ క్రమంలో పోలీసులు ఈ కారును వెంబడిస్తుంటారు. పోలీసుల నుంచి తప్పించుకునేందుకు బసవ తన కారుని భైరవకోనలోకి పోనిస్తాడు. భైరవ కోనలోకి ఎంట్రీ ఇచ్చిన తరువాత బసవ కారు, అతను దొంగిలించిన నగలు మాయం అవుతాయి. అసలు ఈ నగల ఫ్లాష్ బ్యాక్ ఏంటి? భూమి (వర్ష బొల్లమ్మ) కోసం బసవ ఈ దొంగతనాలు ఎందుకు చేస్తాడు? పచ్చ గూడెం కథ ఏంటి? రాజప్ప (రవి శంకర్) ఎవరు? ఈ భైరవకోన ఊర్లోని వింతల వెనుకున్న రహస్యాలేంటి? భైరవకోనలోకి ప్రవేశించడమే తప్పా.. బయటకు వెళ్లడం కుదరదు. అలాంటి ఊర్లో చిక్కుకున్న బసవ బయటకు ఎలా వస్తాడు? అన్నది థియేటర్లో చూడాల్సిందే.
ఈ భైరవకోన మెయిన్ పాయింట్ చూసుకుంటే చాలా పాతదే. భూమి.. ఆ భూమి మీద కన్నేసిన ఒకడు.. ప్రజల్ని అక్కడి నుంచి తరలించడం.. ఆ భూమి కోసం మళ్లీ పోరాడటం.. అనేది అండర్ లైన్‌గా చూపించే పాయింట్. కానీ ఈ పాయింట్‌కు తన ఊహాశక్తితో వీఐ ఆనంద్ భైరవకోన అనే ఓ ఊరుని సృష్టించాడు. దానికి గరుడపురాణం అనే పెద్ద లింక్ పెట్టాడు. కానీ ఆ స్థాయిలో ఈ చిత్రాన్ని మాత్రం తెరకెక్కించలేదనిపిస్తుంది. భైరవకోనకు ఇచ్చిన బిల్డప్‌కు తగ్గట్టుగా అక్కడేమీ జరగదు. ఫస్ట్ హాఫ్‌లో భయపెట్టాలని చూసిన పాత్రలే సెకండాఫ్‌లో కామెడీగా మారుతాయి.
ఫస్ట్ హాఫ్ కాస్త ఇంట్రెస్టింగ్‌గా, ఎంగేజింగ్‌గా సాగుతుంది. కథ ముందుకి వెనక్కి తిప్పుతూ ఇంట్రెస్టింగ్‌గానే నడిపించాడు. మధ్యలో ఫ్లాష్ బ్యాక్ సీన్లు, ప్రజెంట్ సీన్లు అంటూ ఏదో జరుగుతోందనే ఆసక్తిని రేకెత్తించేలానే వీఐ ఆనంద్ తన సినిమాను ముందుకు తీసుకెళ్లాడు. కామెడీ సీన్లు కూడా వర్కౌట్ అయ్యాయి. కొన్ని చోట్ల భయపెట్టేలా కూడా చేశాడు. కానీ హారర్ థ్రిల్లర్ సినిమాలు చూసిన వారికి ఇది మామాలుగా అనిపించొచ్చు.
ఓ సారి చూడాలనిపించే చిత్రం
ఇలాంటి థ్రిల్లర్, సస్పెన్స్ మూవీస్ ఒకసారి చూడటానికి మాత్రం బాగుంటాయి. మళ్లీ మళ్లీ చూడాలనే ఆసక్తి మాత్రం కలిగించవు. అలా మళ్లీ మళ్లీ చూడాలనే ఇంట్రెస్ట్ కలిగించే చిత్రాలు చాలా తక్కువగా వస్తుంటాయి. ఈ భైరవకోన కూడా ఓ సారి చూడాలనిపించే చిత్రంగానే ఉంటుంది. ఫస్ట్ హాఫ్ బాగానే ఉన్నట్టుగా అనిపిస్తుంది. ఇక సెకండాఫ్‌లో కథ మరింత సీరియస్‌గా ఉంటుందని ఆశిస్తారు. కానీ దానికి భిన్నంగా కథ సాగుతుంది. కొన్ని పాత్రలకు సరైన ఎండింగ్ కూడా ఉండదు. ఇక ప్రీ క్లైమాక్స్,క్లైమాక్స్‌లు కూడా ఊహకందేలా సాగుతుంటాయి. కొన్ని ట్విస్టులు ఆకట్టుకుంటాయి.
ప్రధాన బలం మ్యూజిక్
భైరవకోనకు అతి ప్రధాన బలం మ్యూజిక్, విజువల్స్. ఈ రెండూ కూడా థియేటర్లో ప్రేక్షకుడ్ని కూర్చోబెట్టేస్తాయి. పాటలు వినసొంపుగా, చూడటానికి ఎంతో అందంగా ఉంటాయి. ఆర్ఆర్ అద్భుతంగా ఉంటుంది. ఇక విజువల్స్, వీఎఫ్ఎక్స్ ఈ సినిమాకు ప్రధాన బలం. మాటలు కొన్ని చోట్ల బాగానే ఉన్నట్టుగా అనిపిస్తుంది. ఎడిటింగ్ ఓకే అనిపిస్తుంది. సినిమా మాత్రం గ్రాండియర్‌గా కనిపిస్తుంది. పెట్టిన ప్రతీ పైసాకు తగ్గ ప్రతిఫలం వచ్చినట్టుగా అనిపిస్తుంది.
భైరవకోనను మరీ అద్భుతం అని చెప్పలేం.. అలా అని తీసి పారేయలేం. ఒకసారి చూసి ఎంజాయ్ చేసేలా ఉంటుంది. వీఐ ఆనంద్ తన మ్యాజిక్‌ను మరీ అంతగా చూపించలేదనిపిస్తుంది. ఇక సందీప్ కిషన్ కోణంలో చూసుకుంటే ఇది చాలా పెద్ద విజయమే అనిపిస్తుంది. ఎందుకంటే ఈ రేంజ్‌లో సందీప్ కనిపించి చాలా కాలమే అయింది. సందీప్ కిషన్ తన నటనను, కామెడీ యాంగిల్‌ను, యాక్షన్‌ను మరోసారి చూపించి అందరినీ ఆకట్టుకుంటాడు. స్క్రీన్ మీద చాలా చక్కగా కనిపించాడు. హీరోయిన్ పాత్రలు మరీ అంత ముఖ్యమైనవి కాదేమో అనిపిస్తుంది. ఉన్నంతలో వర్ష బొల్లమ్మ ఆకట్టుకుంటుంది. కావ్యా థాపర్‌కి సరైన స్పేస్ దక్కలేదనిపిస్తుంది. హర్ష, వెన్నెల కిషోర్ కామెడీ బాగుంటుంది. రాజప్పగా రవి శంకర్ ఆకట్టుకుంటాడు. బ్రహ్మాజీ, సరయు ఇలా చాలా పాత్రలకు ఓ ఎండింగ్ అంటూ ఉండదు. కానీ కనిపించినంతలో అందరూ తమ తమ పాత్రల్లో ఆకట్టుకుంటారు.