మెగాస్టార్ చిరంజీవి సినిమాలు అంటే తెలుగు రాష్ట్రాల్లోనే కాదు దేశవ్యాప్తంగా, ఆ మాటకొస్తే ప్రపంచ వ్యాప్తంగా తెలుగువాళ్లున్నచోట సందడి వాతావరణం ఉంటుంది. ఈ ఏడాది జనవరిలో వాల్తేరు వీరయ్యగా జనం ముందుకు వచ్చిన చిరంజీవి కొంతవరకూ హిట్ సాధించారు. ఇప్పుడు తాజాగా మళ్లీ భోళా శంకర్ అనే సినిమాతో వచ్చారు.
కథ :
కలకత్తాలో అమ్మాయిల కిడ్నాపులు కలకలం సృష్టిస్తాయి. ప్రభుత్వం, పోలీసులు కూడా ఆ మాఫియాను కట్టడి చేయలేకపోతాయి. మాఫియా హెడ్ అలెగ్జాండర్ (తరుణ్ అరోరా)ను ఎవ్వరూ పట్టుకోలేకపోతారు. ఇక శంకర్ (చిరంజీవి) అదే టైంలో కలకత్తాకు తన చెల్లి మహాలక్ష్మీ (కీర్తి సురేష్) చదువు కోసం వస్తాడు. బతుకుదెరువు కోసం ట్యాక్సీ డ్రైవర్‌గా మారుతాడు శంకర్. సిటీలో జరిగే కిడ్నాపుల వెనుక ఉన్న క్రిమినల్స్ గురించి సిటీలోని డ్రైవర్లందరికీ అవగాహన కల్పిస్తారు పోలీసులు. దీంతో ఓ గ్యాంగ్‌లోని వ్యక్తిని చూసి పోలీసులకు సమాచారం అందిస్తాడు శంకర్. ఆ తరువాత శంకర్‌కు ఎదురైన పరిస్థితులు ఏంటి? అసలు శంకర్ కలకత్తాకు ఎందుకు వచ్చాడు? దాదాగా ఉండే భోళా శంకర్.. శంకర్‌గా ఎలా మారాడు? మహా లక్ష్మీకి శంకర్‌కు ఉన్న సంబంధం ఏంటి? వీళ్లద్దరికీ ఆ మాఫియాతో ఉన్న కనెక్షన్ ఏంటి? చివరకు శంకర్ ఆ మాఫియాను ఎలా తుదముట్టించాడు అనేది కథ.
నవ్వించని కామెడీ:
మెగాస్టార్ చిరంజీవి సినిమా అంటే.. చిరు యాక్టింగ్, కామెడీ, ఎమోషన్స్ ఎక్కువగా అందరి దృష్టిని ఆకర్షిస్తాయి. అయితే ఈ సినిమాలోనూ అదే జరిగింది. చుట్టూ ఎంత మంది నటీనటులున్నా, కమెడియన్లున్నా, మిల్కీ బ్యూటీ ఉన్నా కూడా చిరంజీవి మాత్రమే కనిపిస్తాడు. వినిపిస్తాడు. జబర్దస్త్ స్టేజ్ మీద కమెడియన్లంతా ఉన్నట్టుగా తెరపై కనిపిస్తుంటారు. కానీ ఏ ఒక్కరి కామెడీ కూడా పూర్తిగా పండదు. ఏ ఒక్క సీన్‌ని కూడా మనసారా హత్తుకుని, తనివి తీరా నవ్వుకునేలా తెరకెక్కించలేకపోయాడు మెహర్ రమేష్.
సహన పరీక్ష:
భోళా శంకర్ సినిమాలో కావాల్సినంత మంది కమెడియన్లు, ఆర్టిస్టులున్నారు.. అయితే ఏ ఒక్కరినీ కూడా పూర్తిగా వినియోగించలేదనిపిస్తుంది. మధ్య మధ్యలో మెహర్ రమేష్ జొప్పించిన కామెడీని చూస్తే జనాలు సైతం వెర్రెక్కిపోతారు. కొన్ని సందర్భాల్లో వంశీ (వెన్నెల కిషోర్) పాత్ర తన భార్య ఫోన్ చేస్తుందంటూ.. చిరాకు పడే సన్నివేశాల మాదిరిగానే జనాలు కూడా థియేటర్లో అలానే చిరాకు పడేట్టుగా సీన్లను మలిచాడు. ఏ కామెడీ ట్రాక్ కూడా సరిగ్గా వర్కౌట్ కాలేదు. ఫస్ట్ హాఫ్‌ను అయితే జనాలు సహన పరీక్షలానే ఫీల్ అయ్యేట్టుగా ఉంది.
ఓవర్ యాక్షన్ :
ప్రథమార్దంలో ఏ ఒక్క సీన్ కూడా నవ్వించలేకపోతుంది. ఏ ఒక్క ఎమోషన్‌కి కనెక్ట్ కాలేకపోయింది. కామెడీ పేరిట తమన్నా, బ్రహ్మానందం, వెన్నెల కిషోర్‌తో చేయించిన కామెడీ కాస్తా వెకిలి కామెడీగా మారిపోయింది. అందరిదీ ఓవర్ యాక్షన్ అన్నట్టుగానే అనిపిస్తుంది. ఇక చిరంజీవి లాంటి వ్యక్తి చేత చేయించిన కామెడీని కొన్ని చోట్ల ప్రేక్షకులు భరించలేరు. అలా చేయించాడు మెహర్ రమేష్. ఆ తప్పు కచ్చితంగా మెహర్ రమేష్‌దే అవుతుంది. రీమేక్ అని తెలిసినా, ఏ ఒక్క సీన్ కూడా కొత్తగా తీయలేకపోయాడు. కావాల్సినంత కామెడీకి స్కోప్ ఉన్నా నవ్వు పుట్టించేలా చేయలేకపోయాడు. ఇది కచ్చితంగా మెహర్ రమేష్ చేసిన తప్పే అవుతుంది.
రొటీన్ గా:
ప్రథమార్దాన్ని ఎలాగోలా తట్టుకుని సెకండాఫ్ వరకు ఆడియెన్స్ ఓపిక పడితే కాస్త రిలాక్స్ అనిపించే సీన్లు వస్తాయి. ద్వితీయార్దంలో కీర్తి సురేష్, చిరంజీవి మధ్య వచ్చే రెండు మూడు సీన్లు బాగుంటాయి. మిగతాది అంతా కూడా రొటీన్ రొడ్డ కొట్టుడులానే అనిపిస్తుంది. ఏ ఒక్క షాట్, సీన్ కూడా కొత్తగా ఉందే.. భలే తీశాడే అనిపించేట్టుగా ఉండదు. పైగా వేదాళంలోని సీన్లను ఉన్నది ఉన్నట్టుగా తీసేశాడు మెహర్ రమేష్.
పవన్ కళ్యాణ్ ఫ్యాన్‌లా చిరంజీవి:
చిరంజీవి చేత చెప్పించిన డైలాగులు, చేయించిన యాక్టింగ్, ఆ తెలంగాణ యాస సాధారణ ప్రేక్షకులకు అంత రుచించకపోవచ్చు. ఇక పవన్ కళ్యాణ్ ఫ్యాన్‌లా చిరు నటించడం కూడా అంతగా సెట్ అవ్వలేదు. ఇక ఖుషీ సీన్ రీ క్రియేట్ చేయాలనుకోవడం కూడా మెహర్ రమేష్ పొరబాటే అవుతుంది. ఇక శ్రీముఖితో చేయించింది కామెడీ అనుకుంటే అంత కంటే ఘోరం ఇంకేమీ ఉండదు. సత్య, బిత్తిరి సత్తి, లోబో, వేణు, తాగుబోతు రమేష్, ఆది, వైవా హర్ష ఇలా స్క్రీన్ మీద ఎంత మంది కనిపించినా, పంచ్ వేసినా నవ్వురాదు. ఎవ్వరినీ కూడా సరిగ్గా వాడుకోలేకపోయారు.
కొత్తదనం లేకుండా:
సుశాంత్, తమన్నా ఇలా అందరూ కూడా కూరలో కరివేపాకులా అనిపిస్తారు. విలనిజం కూడా సరిగ్గా సెట్ అవ్వలేదు. హీరో చేతిలో తన్నులు తిని, చావడానికే అన్నట్టుగా విలన్ పాత్రలు కనిపిస్తాయి. రాజా రవీంద్ర, బ్రహ్మాజీల పాత్రలను ఓకే అనిపించేలా డిజైన్ చేశాడు మెహర్. అయితే రీమేక్‌లను మెహర్ రమేష్ బాగానే హ్యాండిల్ చేస్తాడన్న మాటలను ఈ భోళా శంకర్‌తో తుడిచిపారేసుకున్నట్టుగా అనిపిస్తుంది. ఈ సినిమాకు క్లైమాక్స్ ఎవ్వరైనా సరే ఊహిస్తాడు. మన తెలుగు కథలనే తిప్పి తిప్పి అక్కడ శివ వేదాళం అనే సినిమాను తీస్తే.. ఆ సినిమాను ఇక్కడ ఇన్నేళ్ల తరువాత మెహర్ రమేష్ మళ్లీ చూపించాడు. అందులోనూ ఎలాంటి కొత్తదనం లేకుండా చూపించడంతో సగటు ప్రేక్షకుడు కూడా థియేటర్లో ఇబ్బందిగానే ఫీల్ అవుతాడు.
అవుట్ డేటెడ్:
అవుట్ డేటెడ్ కథను, మరింత అవుట్ డేటెడ్‌గా మెహర్ తెరకెక్కించాడు. ఈ సినిమాకు సంగీతం, నేపథ్య సంగీతం అయినా కలిసి వస్తుందా? అంటే.. ఏ ఒక్క పాట కూడా తెరపై ఆకట్టుకోలేకపోయింది. చిరు గ్రేస్, సింపుల్ స్టెప్స్ అంతో ఇంతో వాటిని ఎంజాయ్ చేసేలా చేసింది. భోళాను చూడాలని అనుకుంటే అది కేవలం చిరంజీవి కోసమే అన్నట్టుగా మెహర్ రమేష్ మార్చాడు. అందులోనూ చిరుని సరిగ్గా వాడుకోలేదనిపిస్తుంది. చిరు కామెడీ టైమింగ్‌కు అందరూ ఫిదా అవుతుంటారు. కానీ ఇందులో చిరు చేసిన కామెడినీ కూడా ఎంజాయ్ చేయలేకపోయేలా చేశాడు మెహర్. టెక్నికల్‌గానూ ఈ సినిమాను మెహర్ చక్కగా డిజైన్ చేసుకోలేకపోయాడు. మాటలు పవర్ ఫుల్‌గా అనిపించవు. డడ్లీ కెమెరా వర్క్ ఆకట్టుకుంటుంది. సెట్స్ కూడా భారీగా కనిపిస్తాయి. నిర్మాణ పరంగా చాలానే ఖర్చు పెట్టినా.. దానికి తగ్గ అవుట్ పుట్ తీసుకురావడంలో దర్శకుడు మెహర్ తడబడినట్టుగా అనిపిస్తుంది.
నటీనటులు:
చిరంజీవి, తమన్నా భాటియా, కీర్తి సురేష్, సుశాంత్, రఘు బాబు, మురళీ శర్మ, రవిశంకర్, వెన్నెల కిషోర్, తులసి, శ్రీ ముఖి, బిత్తిరి సత్తి, సత్య, గెటప్ శ్రీను, ఉత్తేజ్
దర్శకుడు : మెహర్ రమేష్
నిర్మాతలు: రామబ్రహ్మం సుంకర, అనిల్ సుంకర, అజయ్ సుంకర
సంగీతం: మహతి స్వర సాగర్
సినిమాటోగ్రఫీ: డడ్లీ
ఎడిటర్: మార్తాండ్ కె వెంకటేష్