దక్షిణాదిలో తమిళంతో పాటు తెలుగులో కూడా మంచి ఫాలోయింగ్ ఉన్న హీరోల్లో విజయ్ సేతుపతి ఒకరు. హీరోగా, విలన్‌గా, క్యారెక్టర్ ఆర్టిస్టుగా ఆయన చేసిన సినిమాలు, పాత్రలు ఆడియన్స్ ఎప్పటికీ మర్చిపోలేరు. అలాంటి విజయ్ సేతుపతి తన కెరీర్‌లో 50 సినిమాలు పూర్తి చేసుకున్నారు. తన మైలురాయి చిత్రం ‘మహారాజ’తో ఆయన ఆడియన్స్‌ను పలకరించారు. థ్రిల్లర్ డ్రామాగా తెరకెక్కిన ఈ చిత్రం ప్రేక్షకుల్ని ఎంతవరకు ఆకట్టుకుందో తెలుసుకుందాం.
సింపుల్ కథ
మహారాజ (విజయ్ సేతుపతి) ఓ సెలూన్ షాప్ నడుపుకుంటూ బతుకుతుంటాడు. అయితే తన భార్య ఓ యాక్సిడెంట్‌లో చనిపోతుంది. కానీ అదే ప్రమాదంలో తన కూతురు జ్యోతి ప్రాణాలతో బయటపడుతుంది. ఓ ఇనుప చెత్తబుట్ట ఆ పాపపై పడటంతో తను బతికి బయటపడుతుంది. తన కూతురు ప్రాణాలు కాపాడటంతో ఆ చెత్తబుట్టకి ‘లక్ష్మి’ అని పేరు పెట్టి ఇంట్లో మనిషిగా చాలా ప్రేమగా చూసుకుంటాడు మహారాజ. ఇక తన కూతురు స్పోర్ట్స్ క్యాంప్‌లో పార్టిసిపేట్ చేయడానికి వేరే ఊరు వెళ్లిన తర్వాత తన ఇంట్లోని ఆ చెత్తబుట్ట పోయిందని, తన కూతురు వచ్చేలోపు ఆ చెత్తబుట్టను కనిపెట్టమని మహారాజ పోలీస్ స్టేషన్ కి వచ్చి కంప్లైంట్ చేస్తాడు.
అసలు చెత్తబుట్ట పోవటమేంటి? దాని కోసం కంప్లెయింట్ ఇవ్వడమేంటని పోలీసులు మొదట నవ్వుతారు. అయినా సరే అక్కడి నుంచి వెళ్లకుండా, పోలీసులు తిట్టినా, కొట్టినా మహారాజ అక్కడే ఉంటాడు. చివరికి అది కనిపెడితే ఎంతైనా డబ్బులు ఇస్తానంటూ పోలీసులకే ఆఫర్ ఇస్తాడు. దీంతో పోలీసులు వీడో పెద్ద మెంటల్ కేసు.. డబ్బులు లాగేద్దామని ప్లాన్ చేసి సేమ్ అలాంటిదే ఓ డూప్లికేట్ చెత్తబుట్టను తయారు చేయడం కోసం ట్రై చేస్తారు. మరోవైపు సెల్వం (అనురాగ్ కశ్యప్) తన స్నేహితుడితో కలిసి దొంగతనాలు, హత్యలు చేస్తూ ఉంటాడు. ఇక అసలు సెల్వంకు, మహారాజకి సంబంధం ఏంటి? ఆ చెత్తబుట్ట పోలీసులకి దొరికిందా? స్పోర్ట్స్ క్యాంప్ కి వెళ్లిన మహారాజ కూతురు తిరిగి వచ్చిందా అనే విషయాలు తెరపై చూడాల్సిందే.
ప్రధాన బలం స్క్రీన్ ప్లే
థ్రిల్లర్ సినిమాలకి ప్రధాన బలం స్క్రీన్ ప్లే. ఇది ఎంత బలంగా ఉంటే సినిమా ఫలితం అంత పాజిటివ్‌గా ఉంటుంది. ఈ పాయింట్‌ను డైరెక్టర్ పక్కాగా ఫాలో అయ్యాడు. ఈ సినిమా కథ సింపుల్‌గా ఉన్నా స్క్రీన్‌ప్లేతో ఓ ఆట ఆడుకున్నాడు డైరెక్టర్. డెబ్యూ డైరెక్టర్ అయినప్పటికీ ఇంత గొప్పగా స్క్రీన్ ప్లేను రాసుకోవడం.. అంతే పర్ఫెక్ట్‌గా ఎగ్జిక్యూట్ చేయడం చాలా గొప్ప విషయం. ఫస్టాఫ్ అంతా చెత్తబుట్ట కోసం మహారాజ పడే ఆరాటం.. పోలీసులు అతనితో ఆడే వెటకారం అంతా ఆడియన్స్‌ను బాగానే నవ్విస్తుంది. అసలు ఓ చెత్తబుట్టను వెతికిస్తే లక్షలు ఇస్తానని మహారాజ చెప్పడం పోలీసులతో పాటు చూసే ఆడియన్స్‌కి కూడా ఆశ్చర్యం కలిగిస్తుంది.
అయితే కథ ముందుకు సాగే కొద్ది ఏ సీన్లు అయితే చూసి ఆడియన్స్ నవ్వుకున్నారో అవే సన్నివేశాలు వారితో కంటతడి పెట్టిస్తాయి. ఇక ఇంటర్వెల్ సీన్‌లో జరిగే యాక్షన్, ట్విస్ట్ అయితే తస్సాదియ్యా అనిపిస్తుంది. ఇక సెకండాఫ్‌లో అసలు కథ మొదలవుతుంది. ఫస్టాఫ్‌లో చూపించిన అవే సన్నివేశాల్లో అసలు ఏం జరిగింది? దానికి ఇప్పుడు జరుగుతున్న సీన్లకి లింకేంటి అనేది చాలా క్లియర్‌గా చూపించాడు డైరెక్టర్. అయితే సెకండాఫ్ మొదలయ్యేటప్పడికీ క్లైమాక్స్ ట్విస్ట్ ఏంటనేది చాలా మంది ఆడియన్స్ ఊహించే అవకాశం ఉంది. అయినా సరే క్లైమాక్స్‌లో ఎమోషన్ బాగా పండటంతో సినిమా మరో స్థాయికి వెళ్లింది. నిజానికి ఈ కథలో కొన్ని ట్విస్ట్‌లు ఉన్నాయి.
సేతుపతి నటన హైలెట్
విజయ్ సేతుపతి యాక్టింగ్ గురించి ఆడియన్స్‌కి ప్రత్యేకంగా చెప్పాల్సిన పని లేదు. అయితే మహారాజ సినిమాలో విజయ్ చాలా అద్భుతంగా నటించారు. సాధారణంగానే విజయ్ సేతుపతి ఫేస్‌లో అమాయకత్వం కనిపిస్తూ ఉంటుంది. ఇది ఈ క్యారెక్టర్‌కి బాగా ప్లస్ అయింది. ఫస్టాఫ్‌లో చెత్తబుట్ట కోసం విజయ్ అమాయకంగా తిరిగితే ఆడియన్స్‌కి జాలి వేస్తుంది. కానీ సెకండాఫ్‌కి వచ్చేసరికి ఓ కూతురి కోసం తపన పడే తండ్రిగా విజయ్‌ను చూస్తే కంట్లో నీళ్లు తిరుగుతాయి. పోలీస్ స్టేషన్‌లో ఓ సన్నివేశంలో విజయ్ ఖచ్చితంగా ఆడియన్స్‌ను ఏడిపిస్తారు. ఇక క్లైమాక్స్‌లో కూడా తనదైన నటన చూపించారు. మరో బలమైన పాత్ర అనురాగ్ కశ్యప్ చేశారు. ఈ పాత్ర క్లైమాక్స్‌లో చూపించే ఎమోషన్ కదిలిస్తుంది. పీటీ టీచర్‌గా మమతా మోహన్ దాస్, అనురాగ్ భార్యగా అభిరామి తమ పరిధి మేరకు బాగానే నటించారు. ఇక విజయ్ కూతురిగా చేసిన పాప కూడా బాగా నటించింది. హీరోయిన్ దివ్యభారతి ఓ గెస్ట్‌ రోల్‌లో కనిపించింది. భారతీరాజా సహా మిగిలిన నటులకి అంతగా స్కోప్ ఏం లేదు. మరోవైపు మ్యూజిక్ విషయానికొస్తే సినిమాల్లో ఒక్కటంటే ఒక్క పాట కూడా లేదు. కానీ ఎక్కడా ఆ లోటు లేకుండా డైరెక్టర్ కథను ముందుకు తీసుకెళ్లారు. ఓవరాల్‌గా తన 50వ సినిమాలో విజయ్ సేతుపతి తన మార్క్ యాక్టింగ్‌ను మరోసారి బలంగా చూపించారు.
నటులు:విజయ్ సేతుపతి,అనురాగ్ కశ్యప్,మమతా మోహన్ దాస్,అభిరామి,భారతీరాజా
దర్శకుడు: నితిలన్ స్వామినాథన్