ప్రస్తుత సమాజంలో యువ జంటలు ఎదుర్కొనే సంతాన సమస్యల్ని సెటారికల్గా చూపిస్తూ…వారిని అలర్ట్ చేసే సినిమా ‘సంతాన ప్రాప్తిరస్తు’ యువత చాలామంది.. ముఖ్యంగా సాఫ్ట్ వేర్ ఉద్యోగాల్లో ఉండేవాళ్లు.. నెలంతా పని చేసి.. వచ్చిన జీతంలో ఎక్కువ మొత్తం ఎంజాయ్మెంట్కే కేటాయిస్తుంటారు. మద్యం, సిగరెట్ ఇతర వ్యసనాలకు బానిసలై తమకు తెలియకుండానే ఎలాంటి ఇబ్బందుల్ని కొనితెచ్చుకుంటున్నారనే సీరియస్ ఇష్యూని ఫన్ మోడ్లో చూపించారు. ఈ వ్యసనాలతో పాటు.. వర్క్ టెన్షన్, నిద్రలేమి వంటి సమస్యలు పర్సనల్ లైఫ్లో ఎలాంటి ప్రభావాలు చూపిస్తున్నాయి. ముఖ్యంగా సంతానలేమికి ఏ విధంగా కారణం అవుతున్నాయనే అంశాలను తాజా విడుదలైన ఈ సినిమా ద్వారా కళ్లకు కట్టారు.
కథ:
సాఫ్ట్వేర్ ఇంజనీర్ చైతన్య అలియాస్ చైతూ (విక్రాంత్) తొలిచూపులోనే కల్యాణి (చాందినీ చౌదరి) ప్రేమలో పడతాడు. ప్రతి ప్రేమకథలో ఉన్నట్టుగానే వీళ్ల వివాహానికి కల్యాణి తండ్రి ఈశ్వరరావు (మురళీధర్ గౌడ్) ఒప్పుకోడు. అయితే పెళ్లై పిల్లల్ని కంటే అతనే ఒప్పుకుంటాడని ఇంట్లో నుంచి వెళ్లిపోయి చైతూని పెళ్లాడుతుంది కల్యాణి. అయితే అక్కడే అసలు సమస్య మొదలవుతుంది. చైతూకి స్పెర్మ్ కౌంట్ తక్కువగా ఉండటంతో పిల్లలు పుట్టే ఛాన్స్ తక్కువని డాక్టర్లు చెప్తారు. ఈ క్రమంలో ఈశ్వరరావు.. కూతురి చేసిన తప్పుని క్షమించి అల్లుడు ఇంట్లో మకాం పెడతాడు. ఆ తరువాత జరిగిన పరిణామాలేంటి? సంతానం కోసం చైతూ పడ్డ తిప్పలేంటి? చివరికి వారి సంతాన సమస్యకి చూపించిన పరిష్కారం ఏంటి? అన్నదే ‘సంతాన ప్రాప్తిరస్తు’ అసలు కథ. సొసైటీలో ప్రస్తుతం ఉన్న ఇన్ ఫెర్టిలిటీ ఎలిమెంట్కి ఫన్ అండ్ ఎమోషన్ని జోడించి.. ‘సంతాన ప్రాప్తిరస్తు’కి గల అవరోధాలను ఎలా జయించవచ్చో చూపించారు దర్శకుడు సంజీవరెడ్డి. గతంలో ‘ఏబీసీడీ’ చిత్రంతో నిరుత్సాహపరిచిన సంజీవరెడ్డి.. ఈసారి సొసైటీలో ఉన్న ఇన్ ఫెర్టిలిటీ అనే సీరియస్ సబ్జెక్ట్ని సున్నితమైన కథతో ఆడియన్స్ని కనెక్ట్ చేసే ప్రయత్నం చేశారు.
ఎమోషనల్గా :
ఫస్టాఫ్ హీరో, హీరోయిన్ల మధ్య ప్రేమాయణం.. పెళ్లి కోసం తిప్పలు.. తండ్రి నుంచి వ్యతిరేకత.. అతన్ని ఎదురించి పెళ్లి చేసుకోవడం ఇదంతా రొటీన్ లాగే అనిపిస్తుంది. పెళ్లైన తరువాత హీరోకి ఉన్న స్పెర్మ్ సమస్య బయటపడిన తరువాత అసలు కథ మొదలౌతుంది. అటు తండ్రి, ఇటు భర్త, ఇద్దరి మధ్య నలిగిపోయే కూతురు.. ఈమూడు పాత్రల మధ్య జరిగే ఘర్షణను ఎమోషనల్గా చూపించారు. రొటీన్ ఫార్మేట్ అనే ఫీలింగ్ అక్కడక్కడా వెంటాడినా.. కథలో ఉన్న ఎమోషనల్ డెప్త్ చాలామంది కనెక్ట్ అవుతుంది. సంతానలేమి అనే సున్నిత సమస్య వల్ల ఎలా నలిగిపోతారు? అది వాళ్ల వ్యక్తిగత జీవితంపైనే కాకుండా.. ప్రొఫెషన్పై కూడా ఎలాంటి ప్రభావం చూపిస్తుంది? దాని వల్ల సమాజంలో ఎలాంటి అవమానాలను ఎదుర్కోవాల్సి వస్తుంది అనే అంశాలను ఎమోషనల్గా చూపించారు. సంతానం కోసం ఐవీఎఫ్ ఫెర్టిలిటీ సెంటర్ కి వెళ్లడం.. అక్కడ వాళ్లకి ఎదురయ్యే పరిస్థితులు, టెస్ట్ల పేరుతో దోపిడీలను సెటారికల్గానే చూపిస్తూ.. సీరియస్ ఇష్యూని గేలి చేయకుండా పరిష్కారం ఉంటుందనే నమ్మకం కలిగించారు.
నటన:
స్పెర్మ్ కౌంట్ తక్కువగా ఉండే హీరో కథ అంటే.. ఇలాంటి లైఫ్ రిస్క్ రోల్స్ని ప్రయోగాత్మకంగా పాతవాళ్లపై కాకుండా కొత్తవాళ్లపైనే ప్రయోగిస్తుంటారు. అలా ఈ పాత్రను యువ నటుడు విక్రాంత్ ఛాలెంజింగ్గానే డీల్ చేశారు. సాఫ్ట్ వేర్ ఎంప్లాయ్గా విక్రాంత్ బాగానే సెట్ అయ్యాడు. ఈ పాత్ర కోసం బరువు కూడా పెరిగి.. పర్ఫెక్షన్ కోసం బాగానే ట్రై చేశాడు. కానీ కొన్ని కొన్ని ఎమోషనల్ సీన్లతో అతని మొహంలో హావభావాలు పలికించలేకపోయాడు. తెలుగు హీరోయిన్ చాందిని చౌదరి అటు తండ్రికి ఇటు భర్తకి మధ్య నలిగిపోయే పాత్రలో మెప్పించింది. ఆమె రోల్ చాలా నీట్గా ప్రజెంట్ చేశారు దర్శకుడు. హీరోయిన్ తండ్రిగా మురళీధర్ గౌడ్.. కథని మలుపుతిప్పే పాత్రలో ఎమోషన్స్ పండించారు. కూతురు జీవితం బావుండాలని తపనపడే బరువైన పాత్రలో నవ్వించారు.. ఏడిపించారు. ‘పెద్దదానివి అయ్యావు కదమ్మా.. పెళ్లి చేసుకుని వెళ్లిపోయావు.. కన్నతండ్రిని కదా ఉండలేకపోయాను’ అంటూ కూతురు దగ్గరకు వచ్చే సీన్కి ఫ్యామిలీ ఆడియన్స్కి కనెక్ట్ అవుతుంది. ఇలాంటి సీన్లు సినిమాలో చాలానే ఉన్నాయి. మురళీధర్ గౌడ్ ఫుల్ లెంగ్త్ రోల్తో ‘బలగం’ స్టార్ ఈజ్ బ్యాక్ అనేట్టుగా మెప్పించారు. ఈ సినిమాలో నల్లిముక్క ఎపిసోడ్తో ఏవిధంగా అయితే హైలైట్ అయ్యారో.. ఈ సినిమాతో కూడా అతనికి మంచి పేరు వస్తుంది. జాక్ రెడ్డి అనే వైవిధ్యమైన పాత్రలో కనిపించారు డైరెక్టర్ కమ్ యాక్టర్ తరుణ్ భాస్కర్. దేవర కథని ప్రకాష్ రాజ్తో చెప్పించినట్టుగా.. ఈ కథని ఈ పాత్రతోనే మొదలుపెట్టించారు దర్శకుడు. జాక్ రెడ్డి పాత్రలో తరుణ్ భాస్కర్ పంచ్లు బాగా పేలాయి. ఇతని పాత్రని కూడా ఫన్ మోడ్లో చూపిస్తూ.. చివర్లో కథకి రిలేట్ చేసిన విధానం బావుంది. ఫెర్టిలిటీ డాక్టర్గా వెన్నెల కిషోర్ ఆ పాత్రలో ఒదిగిపోయాడు. హీరో ఫ్రెండ్గా అభినవ్ గోమటం ఫుల్ లెంగ్త్ రోల్లో కామెడీ పండించారు. జీవన్ కుమార్, హర్షవర్ధన్, సత్య, తాగుబోతు రమేశ్, కిరీటి అనిల్ గీల, సద్దాం ఇలా చాలామంది కమెడియన్లు కనిపించారు.
సాంకేతికంగా:
భారీ ఆర్భాటాలు లేకుండా కథకి తగ్గట్టుగానే మ్యూజిక్, కెమెరావర్క్, మిగిలిన సెటప్ బాగా కుదిరింది. మహి రెడ్డి పండుగల కెమెరా వర్క్, సునీల్ కశ్యప్ మ్యూజిక్, మధుర శ్రీధర్ రెడ్డి నిర్మాణ విలువలు పర్వాలేదు.
నటులు:
విక్రాంత్,చాందినీ చౌదరి,వెన్నెల కిషోర్,తరుణ్ భాస్కర్,అభినవ్ గోమటం,మురళీధర్ గౌడ్
దర్శకుడు:సంజీవ్ రెడ్డి