వెండితెర సత్యభామగా వెలిగిన జమున
*జనవరి 27 నటి జమున వర్ధంతి
మిస్సమ్మ సినిమాలో అమాయకత్వం, అల్లరి పాత్రతో మెప్పించి, ఆ తర్వాత పొగరుబోతు, ఇగో ఉన్న క్యారెక్టర్స్ తో వరుస సినిమాలు చేసి మెప్పించారు నాటి తరం హీరోయిన్ జమున. మొదటిసారి వినాయక చవితి సినిమాలో సత్యభామ పాత్ర పోషించారామె జమున. ఆ తర్వాత శ్రీకృష్ణ తులాభారం సినిమాలో మరోసారి సత్యభామ పాత్ర పోషించి ఆ పాత్రకే వన్నె తెచ్చారు. ఆ సినిమాలో ఎన్టీఆర్ కి ధీటుగా నటించి సత్యభామ పాత్రతో ఆకటుకున్నారు. ఆ సినిమాతో టాలీవుడ్ వెండితెర సత్యభామగా జమునని పిలవడం మొదలుపెట్టారు. అంతలా ఆ పాత్ర ప్రేక్షకుల నిలిచిపోయింది. ఈనెల 27 నటి జమున వర్ధంతి సందర్భంగా ఆమె జీవితవిశేషాలను స్మరించుకుందాం..
జమున 1936 ఆగస్టు 30న హంపీలో జన్మించారు. ఆమె తండ్రి పేరు నిప్పణి శ్రీనివాసరావు, తల్లి కౌసల్యాదేవి. సినిమాల్లోకి రాకముందు ఆమె పేరు జానాభాయి. జ్యోతిష్యుల సూచనతో ఆమె తల్లిదండ్రులు జమునగా పేరు మార్చారు. గుంటూరులోని దుగ్గిరాల బాలికల పాఠశాలలో ఆమె చదువుకున్నారు. తల్లి దగ్గరే గాత్ర సంగీతం, హార్మోనియం నేర్చుకున్నారు. ఖిల్జీరాజుపతనం నాటకంలోని ఓ పాత్రకు సీనియర్‌ నటుడు జగ్గయ్య ఆమెను ఎంపిక చేశారు. ఇదే సమయంలో మహానటి సావిత్రి కెరీర్ ప్రారంభంలో సినిమాలతో పాటు నాటకాల ప్రదర్శనలు కూడా ఇచ్చేవారు. దుగ్గిరాలలో ప్రదర్శన ఇచ్చే సమయంలో ఆమె జమున ఇంట్లోనే ఉన్నారట. అలా జమునతో పరిచయం కూడా ఏర్పడిందట. అప్పుడు సావిత్రినే.. జమునని సినిమాల్లోకి రావాలని ఆహ్వానించారట. ఆమెను ప్రోత్సహించారట. అలా జమునకు సినిమాలపై ఆసక్తి మరింత పెరిగింది. ఈ క్రమంలోనే తన ‘మా భూమి నాటకం’ చూసి డాక్టర్‌ గరికిపాటి రాజారావు జమునకు మొదటి సినీ అవకాశాన్నిచ్చారు. అలా జమున మొదటిసారి 1952లో విడుదలైన పుట్టిల్లు సినిమా కోసం పనిచేశారు.
జమున పలు హిందీ సినిమాలలో కూడా నటించారు. తెలుగు, తమిళం, కన్నడ, హిందీ భాషల్లో దాదాపు 198 కి పైగా సినిమాల్లో నటించారు జమున. 1965లో జూలూరి రమణారావుతో జమున వివాహం జరిగింది. పెళ్లయ్యాక కూడా సినిమాలని కంటిన్యూ చేశారు. ఆ తర్వాత భర్త, పిల్లల కోసం చెన్నై నుంచి హైదరాబాద్ కి తరలివచ్చి అక్కడే నివాసం ఏర్పరుచుకున్నారు. 1967లో ఆమె హిందీలో చేసిన మిలన్ సినిమా, 1964లో విడుదలైన మూగ మనసులు సినిమాలకు గాను ఉత్తమ సహాయ నటిగా ఫిలింఫేర్ అవార్డు లభించింది.
గడుసైన పాత్రలు, ముఖ్యంగా సత్యభామ పాత్రకు కేరాఫ్‌ అడ్రస్‌గా ఆమె నిలిచారు. తెలుగు, తమిళం, కన్నడ, హిందీల్లో కొన్ని వందల చిత్రాల్లో ఆమె నటించారు. ఎన్టీఆర్, ఏఎన్నార్‌, ఎస్వీ రంగారావు, కృష్ణ సహా పలువురు దిగ్గజ నటులతో ఆమె నటించి సినీ ప్రియులను అలరించారు. నటిగానే కాకుండా రాజకీయాల్లోనూ జమున రాణించారు. తెలుగు ఆర్టిస్ట్ అసోసియేషన్ అనే సంస్థ నెలకొల్పి 25సంవత్సరాల పాటు ఎన్నో సేవా కార్యక్రమాలు చేశారామె. ఇందిరాగాంధీ ఆహ్వానం మేరకు రాజకీయాల్లోకి కూడా వచ్చి 1988లో కాంగ్రెస్ తరపున రాజమహేంద్రవరం నుంచి లోక్‌సభకు ఎంపీగా ఎన్నికయ్యారు. ఆంధ్రప్రదేశ్ రాష్ట్ర మహిళా కాంగ్రెస్ అధ్యక్షురాలిగా పనిచేశారు. ఆ తర్వాత ఎన్నికల్లో ఓడిపోయి కొన్నాళ్ళు రాజకీయాలకి దూరంగా ఉన్నారు. అనంతరం బీజేపీలో చేరి వాజపేయి తరపున ప్రచారం చేశారు. రంగస్థల కళాకారుల సమాఖ్య అధ్యక్షురాలిగా కూడా జమున పనిచేశారు. జమున వృద్ధాప్య సంబంధిత వ్యాధులతో బాధపడుతూ 89ఏళ్ల వయసులో 2023 జనవరి 27న హైదరాబాద్‌లోని స్వగృహంలో తుదిశ్వాస విడిచారు.