‘చీకటి వెలుగుల రంగేళీ.. జీవితమే ఒక దీపావళి…’ ఇది ఎంతో ప్రజాదరణ పొందిన సినీగీతం…ఇలాంటి గీతాలెన్నో సినీవినీలాకాశంలో వెలుగు రవ్వలను విరజిమ్మాయి. దీపావళి సందర్భంగా అటువంటి కొన్ని పాటలను గుర్తుచేసుకుందాం…
‘చీకటి వెలుగుల రంగేళీ జీవితమే ఒక దీపావళి’ ఈ పాట దీపావళి పాటల్లో చాలా పాపులర్ అయిన పాట. ‘విచిత్రబంధం’ సినిమా కోసం ఆత్రేయ రాసిన ఈ పాటకు కేవి.మహదేవన్ సంగీతం సమకూర్చారు. ఘంటసాల, పి.సుశీల ఈ పాటను పాడారు. అక్కినేని నాగేశ్వరరావు, వాణిశ్రీ, ఎస్వీ.రంగారావు, గుమ్మడి, నాగయ్య, అంజలీదేవి, సూర్యకాంతం, పద్మనాభం వంటి మహామహులు ఈ సినిమాలో నటించారు. ఆదుర్తి సుబ్బారావుగారి డైరెక్షన్‌లో వచ్చిన ఈ సినిమాలోని ఈ పాటలో అక్కినేని, వాణిశ్రీ అద్వితీయమైన నటన ఆవిష్కరించారు.
సంఘర్షణ సినిమాలో ‘సంబరాలో సంబరాలు దీపాళీ పండగ సంబరాలు’ అనే పాటను పేదలంతా పండుగ ఆనందంగా జరుపుకునే నేపథ్యంలో సాగుతుంది. ఈ పాటలో చిరంజీవి, విజయశాంతి కనిపిస్తారు.
1990 అక్టోబర్ 19 న ‘ఇంటింటి దీపావళి’ సినిమా విడుదలైంది. పి.లక్ష్మీ దీపక్ డైరెక్ట్ చేసిన ఈ సినిమాలో చంద్రమోహన్, ప్రభాకర్ రెడ్డి, సురేష్, వైజయంతి, దివ్యవాణి, విజయలలిత, ప్రభాకర్ రెడ్డి నటించారు. ఈ సినిమాలో ‘కిల కిల జీవితం సాగనీ సాగనీ తీయగా’ అంటూ ఎస్.పి.బాలు, ఎస్.పి.శైలజ బృందం పాడిన పాట సందడిగా సాగిపోతుంది. జాలాది ఈ పాటను రాశారు.
పెళ్లికానుక సినిమాలోని ‘ఆడే పాడే పసివాడ ఆడేనోయి నీతోడ ఆనందం పొంగేనోయి దీపావళి’ అంటూ ఒక పాట దీపావళి సందర్భంలో ఆహ్లాద భరితంగా సాగుతుంది. అక్కినేని నాగేశ్వరరావు, కృష్ణకుమారి నటించిన ఈ సినిమాలోని ఈ పాటను చెరువు ఆంజనేయశాస్త్రి రాసారు. ఏఎం.రాజా, పి.సుశీల పాడారు. ఎప్పుడు ఈ పాట విన్నా, చూసినా పండుగ వాతావరణాన్ని గుర్తు చేస్తుంది.
దాసరి నారాయణరావు దర్శకత్వంలో వచ్చిన ‘మామగారు’ సినిమాలో ‘ఇయ్యాలే అచ్చమైన దీపావళి వెయ్యేళ్లు నిత్యమైన దీపావళి’ అంటూ పాట సాగుతుంది. 1991 లో ముత్యాల సుబ్బయ్య డైరెక్షన్‌లో వచ్చిన ఈ సినిమాలో దాసరి నారాయణరావు, వినోద్ కుమార్, యమున ప్రధాన పాత్రల్లో నటించారు. ఈ సినిమా ‘నాన్ పుడిచా మాపిళ్లై’ అనే తమిళ సినిమాకి రీమేక్‌గా తీశారు. దీపావళి పండుగను వేడుకగా జరుపుకుంటున్నట్లు చిత్రించిన ఈ పాటను సిరివెన్నెల సీతారామశాస్త్రి రాయగా రాజ్-కోటి సంగీతం అందించారు. బాలు, స్వర్ణలత, బృందం పాడారు.
‘షావుకారు’ సినిమాలోని ‘దీపావళి దీపావళి ఇంటింట ఆనంద దీపావళి’ అంటూ సాగే పాటలో వీధులన్నీ దీపాల కాంతుల్లో మెరిసిపోతుంటే ప్రజలంతా బాణాసంచా కాలుస్తూ కనిపిస్తారు. షావుగారు జానకి, ఎన్ టి.రామారావు నటించిన ఈ సినిమాలోని ఈ పాటలో ఆ కాలం నాటి అందమైన దృశ్యాలు కనువిందు చేస్తాయి
భానుమతి, చంద్రమోహన్, సుహాసిని, జయసుధ ప్రధాన పాత్రల్లో నటించిన సినిమా ‘ముద్దుల మనవరాలు’ ఈ సినిమాలోని ‘ఇన్నాళ్ళకు వచ్చిందో దీపావళి.. మమతల దీపావళి దీప కవితావళి’ అంటూ సుహాసిని డ్యాన్స్ చేస్తూ కనిపిస్తారు. జంధ్యాల డైరెక్ట్ చేసిన ఈ సినిమాలోని పాటలకు ఎస్.పి.బాలసుబ్రహ్మణ్యం సంగీతం అందించారు. ఇలా అనేక పాటలు దీపావళి సందర్భాన్ని పరిపూర్ణం చేస్తూ కనువిందుగా, వీనులకు హాయిగా, మనసులకు మధురంగా తాకుతాయి.