తగినంత నిద్ర కరువై ఎంటో మంది ఎన్నో రకాల ఆరోగ్య సమస్యలను ఎదుర్కొంటున్నారు. ఆరోగ్య సూత్రాల్లో వేళకి భోజనం, నిద్రా తప్పనిసరి. ఇది అందరికీ తెలిసిన సంగతే అయినా చేయడం మాత్రం కుదరని పని అయిపోతోంది. భోజనం అయినా అటూ ఇటూగా సమయానికి తినేస్తున్నామేమో కానీ, నిద్ర మాత్రం పూర్తిగా చెయ్యి దాటిపోతోంది.
లైఫ్ లో టెన్షన్స్ ఎక్కువైపోవడం, పనులు పెరిగిపోవడం, గాడ్జెట్స్ మీద ఆధారపడడం ఎక్కువైన కొద్దీ నిద్ర తగ్గిపోతోందన్నది వాస్తవం. అయితే, రాత్రి సరిగ్గా నిద్రపోతేనే పగలు సరిగ్గా పని చేయగలం కదా.. మరి కొన్ని చిన్ని చిన్ని పద్ధతులు పాటించడం ద్వారా హాయైన నిద్రని స్వంతం చేసుకోగలమని నిపుణులు అంటున్నారు.
– నిద్ర లేవడానికే కాదు, నిద్ర పోవడానికి కూడా అలారం పెట్టుకోండి. చాలా సార్లు సాయంత్రాలు మనకి తెలియకుండానే టైం పరిగెడుతుంది, చూస్తూండగానే అర్ధ రాత్రి పన్నెండు దాటిపోతుంది. అందుకే, అలారం పెట్టుకుంటే గుర్తుంటుంది.
-ఇప్పుడు అలారం అంటే సెల్ ఫోన్ లోనే కదా పెట్టుకుంటాం. సెల్ ఫోన్‌లో అలారం పెట్టినప్పుడు స్నూజ్ బటన్ ప్రెస్ చేస్తూనే ఉంటాం. అలాగని ఆ సమయంలో తీరుగా నిద్ర పడుతుందా అంటే అదీ లేదు. నిద్ర లేవాల్సిన సమయానికి అరగంట ముందుగా అలారం పెట్టుకుని ఆ అరగంటా స్నూజ్ బటన్ నొక్కుతూ ఉండడం కంటే సరైన సమయానికే అలారం పెట్టుకుంటే ఆ అరగంటా కూడా హాయిగా నిద్రపడుతుంది.
-సాయంత్రం నాలుగు దాటిన తరువాత కెఫీన్ జోలికి పోకుండా ఉండాలి.
– రాత్రి నిద్రా సమయానికి దగ్గరగా ఆల్కహాల్ తీసుకోకుండా ఉంటే మంచిది.
– మీ బెడ్‌రూమ్ ని చీకటిగా ఉంచుకోండి. బయట నుండి స్ట్రీల్ లైట్స్ వెలుతురు కానీ, అపార్ట్మెంట్ కారిడార్స్‌లో ఉంచే లైట్స్ వెలుతురు కానీ రూమ్ లోకి పడుతూ ఉంటే గాఢమైన నిద్ర కుదరదు. నిజానికి డిజిటల్ క్లాక్ వెలుతురు కూడా డిస్టర్బెన్స్ గానే ఉంటుంది.
– బెడ్‌రూమ్ కూడా కొద్దిగా చల్లగా ఉంటే చక్కని నిద్ర పడుతుంది అంటున్నారు నిపుణులు. అయితే ఎంత చల్లగా అనేది వ్యక్తుల శరీర తత్వాలని బట్టి మారుతూ ఉంటుంది. కాబట్టి, మీకు సరిపోయే చల్లదనం లో మీ బెడ్‌రూమ్ ఉండడం అవసరం.
– రాత్రి నిద్ర కి కనీసం గంట ముందు నించే స్మార్ట్ ఫోన్స్, టీవీలు, ట్యాబ్స్, ల్యాప్టాప్స్.. అంటే స్క్రీన్స్ అన్ని బంద్ చేయాలనే నిర్ణయానికి రావడమే కాక ఆ నిర్ణయాన్ని తు.చ తప్పకుండా అమలు చేయాలి.
– రోజూ వ్యాయామం చేయడం వల్ల చక్కని నిద్ర పడుతుంది. అయితే, ఈ ఎక్సర్సైజ్ అన్నది నిద్రకి ముందుగా మాత్రం చేయకూడదు.
– రాత్రి డిన్నర్ లేట్ అయితే, హెవీగా భోజనం చేయకండి, ఒక ముద్ద తక్కువే తినండి. అరగడానికి సమయం పడుతున్న కొద్దీ నిద్ర సరిగ్గా పట్టదు.
– మీ బెడ్ ని నిద్రకీ, శృంగారానికి మీ మాత్రమే వాడండి. బెడ్ మీద కూర్చుని ఆఫీస్ వర్క్ చేస్కోవడం, టీవీ చూడడం వంటి పనులు చేయకండి.
– నిద్రపోవడానికి ముందు ఏదైనా బుక్ చదివితే హాయిగా నిద్ర పడుతుందంటారు, నిజమే. కానీ, మిస్టరీలు, థ్రిల్లర్లు లాంటి పుస్తకాలు చదివితే వచ్చే నిద్ర కూడా ఎగిరిపోతుంది. కాబట్టి, ఏ పుస్తకం ఎంచుకుంటున్నారు అనేది కూడా ముఖ్యమే. లైట్ రీడింగ్ ఈ టైంలో బెస్ట్ అంటారు నిపుణులు.
– వీకెండ్స్ అయితే లేట్ గా నిద్ర లేవచ్చ్చు అనుకునే ఆలోచనకి స్వస్తి చెప్పండి. ఏ రోజైనా ఒకే సమయానికి నిద్రపోవడం, ఒకే సమయానికి నిద్ర లేవడం ఎంతో అవసరం.
– మీ పరుపు, దిండు మీకు సౌకర్యంగా ఉండేలా చూసుకోండి.
– పడుకోవడానికి ముందు ఒక గ్లాసు గోరు వెచ్చని పాలు తాగడం వల్ల కూడా బాగా నిద్రపడుతుందంటారు.
– అరోమా థెరపీ కూడా ఎంతో హెల్ప్ చేస్తుంది.
రోజూ నిద్రకి ముందు మరునాటికి బట్టలు రెడీ చేసి పెట్టుకోవడం, బ్రష్ చేసుకోవడం, ఆ రోజు చక్కగా గడిచినందుకు కృతజ్ఞతగా ఫీల్ అవ్వడం, ప్రేయర్ చేసుకోవడం వంటి పనుల ద్వారా మనసూ, శరీరం కూడా నిద్రకి సమాయత్తమవుతాయి.